مِل کر کرلیں آؤ وِچار
موسم بدلا ہے سرکار
باغِ باہو پہ چھائی بہار
چشمہ شاہی ڈَل بیزار
ایک نظر بس دیکھا تھا
اب تک ہے آنکھوں میں خمار
کیا پوچھو ہو میرا حال
میں ہوں اِک ڈھہتی دیوار
کشتی ساحل سے ہے دْور
طوفاں کے بھی ہیں آثار
اَپنا ہے بس ایک خْدا
باقی سب مطلب کے یار
جب مٹی ہی باغی ہو
کتنی جہد کرے گا کمہار
سچ کے دم پر لڑتا ہے
ہو گی یقیناً اس کی ہار
نرغے میں ہوں اَپنوں کے
کون کریگا پہلا وار
کوئی خبر راحت کی ڈھونڈ
خون سے لت پت ہیں اَخبار
اِس کی عزت کرنا سیکھ
یہ عارف کی ہے دَستار
عرفان عارف
جموں
