غالب برہان وانی
اک بات وہ کہ چاہ کے منہ سے ادا نہ ہو
جیسے کہ شعر کہنے کو اب قافیہ نہ ہو
اک بات جس کی جراتِ اظہار ہو محال
اک شاخ جس پہ پھول کوئی بھی نیا نہ ہو
شاعر کو اپنی ایک غزل بیچنی پڑے
اور اس کے پاس اور کوئی راستہ نہ ہو
یوں ہو کہ درمیان بہت رنجشیں ہوں اور
اک دوسرے سے کوئی کبھی بھی جدا نہ ہو
وحشی ہوائیں آتی ہوں جنگل کی سمت سے
اس گھر میں اور کوئی دریچہ کھلا نہ ہو
اک شام جس میں ٹوٹ پڑیں کوہِ غم کئی
اک شہر جس میں کوئی بھی غم آشنا نہ ہو
اک عکس مانگتا رہے اذنِ کلام اور
پیشِ نگاہ کوئی مگر آئینہ نہ ہو
اک چیخ جس سے ساری فضا مطمئن رہے
لگنے کو لگ رہا ہو پہ محشر بپا نہ ہو
ترکِ انا نہیں نہ سہی راہِ عشق میں
لیکن رہے دھیان کہ ترکِ وفا نہ ہو
اک رات پر تپاک و دھنک رنگ و پر شرر
اک طاقچہ کہ جس میں کوئی بھی دیا نہ ہو
شہہ رگ کو کوئی کاٹ لے اْس کی تلاش میں
اور عرش کے بھی پار وہ اْس کا خدا نہ ہو
جوشِ قدح سے بزمِ طرب جھوم اٹھی ہو اور
پھر اْس پہ یہ کہ کوئی بھی نغمہ سرا نہ ہو
