، ایک کروڑ نوجوانوں کو نوکریاں دینے کا وعدہ
پٹنہ، // راشٹریہ جنتا دل (آر جے ڈی) نے ہفتہ کو اپنا منشور جاری کیا، جس میں اس نے ایک کروڑ نوجوانوں کو روزگار دینے اور خواتین کو سالانہ ایک لاکھ روپے دینے سمیت 24 وعدے کیے ہیں۔
آر جے ڈی لیڈر اور سابق نائب وزیر اعلی تیجسوی پرساد یادو نے ہفتہ کو یہاں پارٹی کے ریاستی دفتر میں سینئر لیڈروں کی موجودگی میں اپنا منشور جاری کیا، جسے پریورتن پتر نام دیا گیا ہے۔ سال 2024 کے لوک سبھا انتخابات کے لیے جاری پریورتن پتر میں 24 وعدے کیے گئے ہیں، جس میں پورے ملک میں ایک کروڑ نوکریاں، غریب خواتین کو ایک لاکھ روپے سالانہ، 500 روپے میں گیس سلنڈر، 200 یونٹ مفت بجلی، 10 فصلوں پر کم از کم امدادی قیمت ( ایم ایس پی) اور بہار کو خصوصی درجہ دینے کا وعدہ شامل ہے۔
مسٹر تیجسوی یادو نے پریس کانفرنس میں کہا ’’بہار میں 17 سال کے بنام 17 ماہ کی طرز پر، ہم سبھی سرکاری محکموں اور سرکاری اداروں میں 30 لاکھ خالی آسامیوں کے علاوہ 70 لاکھ آسامیاں پیدا کریں گے اور کل ایک کروڑ نوکریاں فراہم کریں گے۔ ہم کنٹریکٹ اور عارضی نوکریوں کو مستقبل کرنے کے لئے بھی مہم چلائیں گے۔ ہم لوگوں سے یہ وعدہ کرتے ہیں کہ جس طرح بہار میں نوکری کا مفہوم تیجسوی ہوگیا ہے یہی وعدہ ہم اس انتخابات میں ایک عزم کی قرارداد کے طور پر کرتے ہیں۔ اس لیے مرکز میں آر جے ڈی کی حمایت یافتہ مخلوط حکومت کے قیام کے چھ ماہ کے اندر اندر ایک کروڑ نوکریاں پیدا کرنے کا عمل شروع کیا جائے گا۔
پریورتن پتر میں کہا گیا ہے کہ بہار کے لیے خصوصی ریاست کا مطالبہ تقریباً دو دہائیوں پرانا ہے۔ یہ ناقابل تصور ہے کہ بہار کی ترقی کے بغیر ملک ترقی کرے گا۔ ہماری حکومت بنتے ہی ہم بہار کو اس کی خصوصی ریاست کا حق دیں گے تاکہ بہار بھی ترقی یافتہ ریاستوں کے زمرے میں شامل ہو تے ہوئے جامع ترقی کو یقینی بنا سکے۔ آبادی کے لحاظ سے ملک کی تیسری سب سے بڑی ریاست اور سماجی، اقتصادی اور جغرافیائی نقطہ نظر سے پسماندہ ریاست ہونے کی وجہ سے بہار کی ہمہ جہت ترقی کے لیے اگلے پانچ سالوں میں 1 لاکھ 60 ہزار کروڑ روپے کی خصوصی مالی امداد دی جائے گی۔ یہ مالی رقم 40 لوک سبھا حلقوں میں متناسب طور پر تقسیم کی جائے گی۔ اس کے تحت ہر لوک سبھا حلقہ کو 4000 کروڑ روپے کی خصوصی رقم ملے گی۔
راشٹریہ جنتا دل اور اتحاد میں شامل تمام جماعتوں نے فیصلہ کیا ہے کہ چار سالہ اگنی ویر اسکیم کو منسوخ کرکے فوج میں مستقل ملازمت کو یقینی بنایا جائے گا اور 2014 سے پہلے کی طرح فوج میں بھرتی کے عمل کو تیز کیا جائے گا۔ پیرا ملٹری فورسز کے جوانوں کی فرض شناسی میں شہادت کے بعد ان کو شہید کا درجہ دینا ہمارا عزم ہے۔
پریورتن پتر میں وعدہ کیا گیا ہے کہ ریلوے میں بھرتیوں کو 2014 سے پہلے کے معیار پر لے جا کر اسے دوگنا کر کے مایوس نوجوانوں کو روزگار کے مواقع فراہم کیے جائیں گے۔ ریلوے میں بھرتی سے نہ صرف نوجوانوں اور ان کے خاندانوں کو مدد ملے گی بلکہ اس کی سروس کے معیار میں بھی بہتری آئے گی۔ پچھلی دہائی میں ریلوے کے انفراسٹرکچر کو اتنا نہیں پھیلایا گیا جتنا ہونا چاہیے تھا۔ پہلے کی طرح، ریلوے میں بزرگوں اور معذوروں سمیت دیگر زمروں کے لیے ٹکٹ کی رعایتیں بحال کر دی جائیں گی۔
آر جے ڈی نے پریورتن پتر میں وعدہ کیا ہے کہ ہر غریب خاندان کی خواتین کو ہر سال ایک لاکھ روپے کی امداد دی جائے گی۔ لڑکیوں کو تغذیہ اور اسکول میں رہنے کی ترغیب کے طور پر اسکالرشپ فراہم کریں گے، تاکہ وہ پیچھے نہ رہیں۔ ہماری خواتین کس طرح کامیاب کاروباری بن سکتی ہیں ایک خصوصی سیل کے ذریعے حکومت کے قیام کے چھ ماہ کے اندر سیلف ہیلپ گروپس اور خواتین کو مدد اور ہنر کے لیے تربیت دی گئی تاکہ وہ اپنے کاروبار کو ترقی دے سکیں۔
