کہا جموں و کشمیر کو امن و استحکام اور خوشحالی کی نئی بلندیوں تک پہنچانے کے لیے اپنی پارٹی کو مضبوط کریں
لازوال ڈیسک
سرینگر؍؍ اپنی انتخابی مہم کو جاری رکھتے ہوئے، اپنی پارٹی کے صوبائی صدر اور لوک سبھا انتخابات میں سرینگر حلقے کے لئے پارٹی امیدوار محمد اشرف میر نے آج کنگن علاقے کا دورہ کیا۔ ان کے ساتھ گاندربل حلقہ کے پارٹی انچارج قاضی عمر، زون صدر کے علاوہ درجنوں کارکنان تھے۔موصولہ بیان کے مطابق محمد اشرف میر نے لوگوں سے ملاقات کی اور ان سے اپیل کی کہ وہ جموں و کشمیر کو امن و استحکام اور خوشحالی کی نئی بلندیوں تک پہنچانے کے لیے اپنی پارٹی کو مضبوط کریں۔
انہوں نے کہا، ’’روایتی سیاسی جماعتوں کے برعکس، اپنی پارٹی جھوٹے وعدوں اور فریب پر مبنی نعروں پر یقین نہیں رکھتی۔ ہم آپ کو چاند ستاروں توڑ کر لانے کا وعدہ نہیں کرتے ہیں، لیکن ہم آپ کو یقین دلاتے ہیں کہ اپنی پارٹی جموں و کشمیر میں مستقل امن، پائیدار خوشحالی اور ترقی کو یقینی بنائے گی۔ عوام کی فلاح و بہبود کے لیے ہمارے پاس ایک غیر واضح ایجنڈا ہے۔‘‘محمد اشرف میر نے لوگوں سے اپیل کی کہ وہ لوک سبھا انتخابات میں انہیں ووٹ دیں۔ انہوں نے کہا، ’’میں آپ کو یقین دلاتا ہوں کہ میں آپ کو مایوس نہیں کروں گا۔ پارلیمنٹ میں عوام کے حقوق کے لیے آواز بلند کروں گا۔ اپنی پارٹی کے منتخب نمائندے اس بات کو یقینی بنانے میں کوئی کسر نہیں چھوڑیں گے کہ جموں و کشمیر کے لوگوں کو وہ تمام حقوق ملیں جو ملک کے آئین کے مطابق ملک کے تمام شہریوں کو حاصل ہیں۔‘‘
