اس بات سے کسی کو انکار نہیں کہ آئے دنوں سائبر فراڈ، تیزرفتاری سے بڑھتی ہوئی اس ڈیجیٹل زندگی کیلئے ایک بڑا خطرہ بن کر سامنے آیا ہے، جس کے نتیجے میں یوں کہا جائے مالی اور جذباتی تباہی پھیل رہی ہے۔وہیں انٹرنیٹ کی گمنامی اور سائبر جرائم پیشہ افراد کی نفاست نے اس بڑھتے ہوئے خطرے کا مقابلہ کرنا ایک مشکل کام بنا دیا ہے۔ فشنگ گھوٹالوں سے لے کر شناخت کی چوری تک، سائبر فراڈ کرنے والوں کے ذریعے استعمال کیے جانے والے حربے بے حد خطرناک ہیں۔جبکہ یہاںیہ کہنا درست ہوگا کہ سائبر فراڈ کے نتائج بہت دور رس اور تباہ کن ہیں۔ سائبر فراڈ کے متاثرین اکثر جذباتی صدمے کا شکار ہوتے ہیں کیونکہ ان کے کریڈٹ سکور کو نقصان پہنچتا ہے۔جس کی وجہ سے انہیں جہاں مالی طور پر نقصان پہنچتا ہے ، وہیں ان کے ذہن پر بھی برے اثرات مرتب ہوتے ہیں ، جس کے باعث کئی لوگ ذہنی مریض بن جاتے ہیں اور کئی اپنی زندگیوں تک کو ختم کر دیتے ہیں۔ یہاں یہ بات بھی قابل زکر ہے سائبر فراڈ کے جال میں زیادہ تر کمزور اور کم تعلیم یافتہ آبادی والے لوگ ہی آتے ہیںاور بڑی آسانی سے ان گھوٹالوں کا شکار بنتے ہیں۔ تاہم اس مسئلہ پر قابو پانا وقت کی اہم ضرورت ہے اور اس پر بیداری پیدا کرنا اور کارروائی کرنا سماجی ذمہ داری کا معاملہ بھی بنتا ہے ۔ کیونکہ ٹیکنالوجی کے تیز رفتار ارتقاء نے سائبر جرائم پیشہ افراد کے لیے نئی راہیں پیدا کی ہیں۔سوشل میڈیا پلیٹ فارمز، آن لائن مارکیٹ پلیسز، اور موبائل بینکنگ ایپس دھوکہ دہی کی سرگرمیوں کی بنیاد بن چکے ہیں۔جبکہ ڈیجیٹل خواندگی کی کمی اور ان پلیٹ فارمز پر ہمارا بھروسہ ہمیں گھوٹالوں اور دھوکہ دہی کا شکار بناتا ہے۔تاہم سائبر فراڈ سے نمٹنے کے لیے،ایک کثیر جہتی نقطہ نظر کی ضرورت ہے جس میں افراد، کاروباری حضرات اور حکومتیں مل کر کام کریں۔ اتنا بھی نہیں بلکہ اس سلسلہ میں سائبر سیکیورٹی کے بنیادی ڈھانچے کو مضبوط بنانا، مضبوط تصدیقی پروٹوکول کا نفاذ، اور باقاعدگی سے سیکیورٹی آڈٹ کا انعقاد بھی ضروری اقدامات ہیں۔ مزید برآں، سائبر فراڈ کے خطرات اور ڈیجیٹل چوکسی کی اہمیت کے بارے میں خود کو اور دوسروں کو آگاہ کرنا بھی بہت ضروری ہے۔کیونکہ سائبر فراڈ ایک سنگین خطرہ ہے جو ایک اعلیٰ سطح کی توجہ اور اجتماعی کارروائی کا مطالبہ کرتا ہے۔ اسلئے اس سمت کچھ فعال اقدامات کرکے، ہی ہم اپنی ڈیجیٹل زندگیوں کو محفوظ رکھ سکتے ہیں اور سائبر فراڈ کے نتیجے میں ہونے والی مالی اور جذباتی تباہی کو روک سکتے ہیں۔
