• سرینگر؍؍ جموں وکشمیر کی اپوزیشن جماعتوں نے ریاست کو خصوصی پوزیشن عطا کرنے والی آئین ہند کی دفعہ 35 اے کے دفاع کے لئے ریاستی حکومت کی طرف سے اٹھائے گئے اقدامات اورریاست کو درپیش دوسرے سنگین مسائل پر بحث کے لئے اسمبلی کا خصوصی اجلاس بلانے کا مطالبہ کیا ہے۔ خیال رہے کہ عدالت عظمیٰ نے گذشتہ ہفتے ریاستی حکومت کی اپیل پر دفعہ 35 اے سے متعلق مقدمے کی سماعت دیوالی کے تہوار تک موخرکردی۔ نیشنل کانفرنس کے ایک ترجمان نے بتایا کہ پارٹی کے صدر و رکن پارلیمان ڈاکٹر فاروق عبداللہ کی قیادت میں پیر کے روز ریاستی اپوزیشن کا ایک اعلیٰ سطحی وفد گورنر شری این این ووہرا سے راج بھون میں ملاقی ہوا۔تفصیلات کے مطابق صدرِ نیشنل کانفرنس ڈاکٹر فاروق عبداللہ کی قیادت میں آج ریاستی اپوزیشن کا ایک اعلیٰ سطحی وفد گورنر این این ووہرا سے راج بھون میں ملاقی ہوا۔ وفد میں ریاستی کانگریس صدر جی اے میر، سی پی آئی ایم کے ایم وائی تاریگامی، پی ڈی ایف کے حکیم محمد یاسین، ڈی پی ایم کے غلام حسن میر، نیشنل کانفرنس کی علی محمد ساگر، سینئر لیڈران عبدالرحیم راتھر، محمد شفیع اوڑی، میاں الطاف احمد اور محمد اکبر لون اور کانگریس کے عثمان مجید شامل تھے۔این این ووہرا سے ملاقات کے بعد ذرائع ابلاغ کے نمائندوں سے بات چیت کرتے ہوئے صدرِ نیشنل کانفرنس ڈاکٹر فاروق عبداللہ نے کہا کہ اپوزیشن لیڈران کے وفد نے گورنر پر زور دیا کہ وہ ریاست کے موجودہ حالات کو مدنظر رکھتے ہوئے اسمبلی کا اجلاس طلب کرے۔ انہوں نے کہا کہ وفد نے گورنر کو اس بات سے آگاہ کیا کہ اس وقت ریاست ہر معاملے میں بے چینی کی شکار ہے، سیاسی انتشار کے ساتھ ساتھ انتظامی بحران عروج پر ہے۔ چور دروازے سے بھرتیاں عمل میں لائیں جارہی ہیں، اقربا پروری اور اقربانی نوازی کا دور دورہ ہے، پیسوں کے عیوض نوکریاں کی فراہمی کا چلن عام ہوگیا ہے، ایسے اقدامات اٹھائے جارہے ہیں جو ریاست کیلئے تباہی اور بربادی کا باعث بن سکتے ہیں۔ ڈاکٹر فاروق عبداللہ نے کہا کہ ہم نے گورنر پر زور دیا کہ وہ ذاتی مداخلت کرکے اسمبلی کا سیشن طلب کریں ، جس میں عوامی نمائندوں قانون ساز کونسل اور قانون ساز اسمبلی میں اپنے اپنے لوگوں اور علاقوں کے مسائل و مشکلات اور زمینی صورتحال سامنے لاسکیں۔ اس موقعے پر سی پی آئی کے ایم وائی تاریگامی نے ذرائع ابلاغ کے نمائندوں کے سوالات کا جواب دیتے ہوئے کہا کہ اس وجہ جو سیاسی اور انتظامی معاملات ہیں اُن کی وجہ سے لوگوں میں بے چینی ہے۔ ہم اُمید کرتے ہیں کہ ریاست کے گورنر شری این این ووہرا ریاست جموں وکشمیر کی صورتحال کی نزاکت کو مدنظر رکھتے ہوئے اسمبلی کا اجلاس بلائیں گے۔ موجودہ حکومت نے اسمبلی کے فورم کو کمزور بنادیا ہے، اگر اس ادارے کو فعال بنانے ہے تو موجودہ سیاسی اور روز مرہ کے معاملات کے پیش نظر فوری طور پر اسمبلی سیشن بلایا جانا چاہئے۔اس سے قبل اپوزیشن لیڈران نے صدرِ نیشنل کانفرنس ڈاکٹر فاروق عبداللہ کی رہائش پر ایک میٹنگ منعقد ہوئی، جس میں ریاست جموں وکشمیر کے موجودہ سیاسی، انتظامی اور سیکورٹی صورتحال کے علاوہ دیگر معاملات کے بارے میں تبادلہ خیالات کیا گیا ۔

• سرینگر؍؍جنوبی کشمیر کے ضلع کولگام میں پیر کے روز جنگجوؤں کی طرف سے کئے گئے گرینیڈ حملے میں سینٹرل ریزرو پولیس فورس (سی آر پی ایف) کے چار اہلکار زخمی ہوگئے۔ سرکاری ذرائع نے یو این آئی کو بتایا کہ جنگجوؤں نے ضلع کولگام کے قاضی گنڈ میں سری نگر جموں قومی شاہراہ پر 163 بٹالیں سی آر پی ایف کی ایک گشتی پارٹی کو نشانہ بناکر گرینیڈ پھینکا۔ انہوں نے بتایا کہ اس حملے میں سی آر پی ایف کے چار اہلکار زخمی ہوگئے جنہیں علاج ومعالجہ کے لئے اسپتال میں داخل کرایا گیا ہے۔ سیکورٹی ذرائع نے بتایا کہ گرینیڈ حملہ انجام دینے والے جنگجو فرار ہونے میں کامیاب ہوگئے ہیں۔ تاہم سیکورٹی فورسز نے انہیں ڈھونڈ نکالنے کے لئے علاقہ میں تلاشی آپریشن شروع کردیا ہے۔ جنگجوؤں کی جانب سے یہ حملہ شمالی کشمیر کے ایپل ٹاون سوپور میں ایک مسلح تصادم میں ایک ایچ ایم کمانڈر سمیت دو جنگجوؤں کی ہلاکت کے چند گھنٹے بعد انجام دیا گیا۔

• سرینگر؍؍شمالی کشمیر کے ضلع بارہمولہ کے ایپل ٹاون سوپور میں پیر کی صبح جنگجوؤں اور سیکورٹی فورسز کے مابین ہونے والے ایک مسلح تصادم میںحزب المجاہدین کے ڈویژنل کمانڈر سمیت دو جنگجوؤں کو ہلاک کیا گیا۔ مقامی جنگجوؤں کی ہلاکت کے تناظر میں احتجاجی مظاہروں کے خدشے کے پیش نظر ضلع بھر کے تمام تعلیمی اداروں میں احتیاطی اقدامات کے طور پر یک روزہ تعطیل کے اعلان کے علاوہ موبائیل انٹرنیٹ خدمات منقطع کی گئی ہیں۔ ریاستی پولیس سربراہ ڈاکٹر شیش پال وید نے کامیاب آپریشن انجام دینے پر سیکورٹی فورسز کو مبارکباد پیش کرتے ہوئے ایک ٹویٹ میں کہا ’سوپور میں آج صبح ایک مشترکہ آپریشن میں حزب المجاہدین کے 2 جنگجوؤں کو ہلاک کیا گیا‘۔ مارے گئے جنگجوؤں کی شناخت حزب المجاہدین کے ڈویژنل کمانڈرپرویز احمد وانی عرف پرویز گلورہ ساکنہ گلورہ ہندواڑہ اور نعیم احمد نجار ساکنہ براٹھ کلان سوپور کے بطور کی گئی ہے۔ کشمیر زون کے انسپکٹر جنرل آف پولیس منیر احمد خان نے یو این آئی کو بتایا ’جنگجوؤں کی لاشوں کی شناخت کے عمل کے دوران ہمیں پتہ چلا کہ مارے گئے جنگجوؤں میں ایچ ایم کا ڈویژنل کمانڈر پروزیر گلورہ بھی شامل ہے۔ دوسرے جنگجو کی شناخت براٹھ کلان سوپور کے رہنے والے نعیم احمد کے بطور ہوئی ہے‘۔سیکورٹی ذرائع نے بتایا کہ پرویز گلورہ کو جنگجوؤں سے متعلق اے پلس پلس زمرے میں رکھا گیا تھا۔ انہوں نے بتایا کہ مسلح تصادم کے مقام سے دو اے کے 47 رائفلیں، ایک انساس رائفل اور دیگر اسلحہ و گولہ بارود برآمد کیا گیا۔ شمالی کشمیر کے ڈپٹی انسپکٹر جنرل آف پولیس نتیش کمار نے مسلح تصادم کی تفصیلات فراہم کرتے ہوئے بتایا کہ سوپور کے شنکر گنڈ براٹھ میں جنگجوؤں کی موجودگی سے متعلق خفیہ اطلاع ملنے پر جموں وکشمیر پولیس ، فوج اور سینٹرل ریزرو پولیس فورسز نے مذکورہ گاؤں میں پیر کی صبح تلاشی آپریشن شروع کیا۔ انہوں نے بتایا کہ تلاشی آپریشن کے دوران جنگجوؤں نے سیکورٹی فورسز پر فائرنگ کی اور جوابی فائرنگ میں دو جنگجوؤں کو ہلاک کیا گیا۔ ریاستی پولیس نے اپنے آفیشل ٹویٹر اکاؤنٹ پر ایک ٹویٹ میں کہا ’براٹھ سوپور میں ہونے والے مسلح تصادم میں ریاستی پولیس، فوج اور سی آر پی ایف نے دو جنگجوؤں کو ہلاک کیا‘۔ ذرائع نے بتایا کہ شنکر گنڈ براٹھ مین ٹاون سوپور سے محض تین کلو میٹر کی دوری پر واقع ہے۔ انتظامیہ نے احتیاطی اقدامات کے طور پر بارہمولہ اور بانڈی پورہ اضلاع کے تمام تعلیمی اداروں میں آج تعطیل کا اعلان کیا ہے۔ اس کے علاوہ ضلع بارہمولہ کے مختلف علاقوں میں موبائیل انٹرنیٹ خدمات معطل کردی گئی ہیں۔ سرکاری ذرائع نے بتایا کہ انٹرنیٹ خدمات کی معطلی کا اقدام سوشل میڈیا پر کسی بھی طرح کی افواہ بازی کو روکنے کے لئے اٹھایا گیا ہے۔

مودی۔ شاہ کے قریبی کا پتہ ہوا صاف

نئی دہلی ؍؍میڈیارپورٹس کے مطابق وزیر اعظم کی کابینہ میں توسیع میںجہاں نرملا سیتا رمن کے قد بڑھنے سے لوگ حیران ہیں وہیں اوما بھارتی کے بے قریبی رہے پرہلاد پٹیل کو وزیر نہیں بنائے جانے پر بھی کافی بحث ہورہی ہے ۔ دراصل شمال مشرق منی پور میں کمل کھلانے والے پرہلاد پٹیل کو وزیر بنایا جانا تقریبا طے مانا جارہا تھا ۔ منی پور میں پہلی مرتبہ بی جے پی اقتدار میں آئی ہے ۔ پرہلاد پٹیل کو وزیر اعظم مودی اور بی جے پی صدر شاہ کا بھی قریبی مانا جاتا ہے ۔ایسے میں ممکنہ وزرا کی فہرست میں نام ہونے کی باوجود آخری وقت پر پرہلاد پٹیل کا پتہ کاٹ دیا گیا ، جس کی اصل وجہ اوما بھارتی کو مانا جارہا ہے ۔ جس لودھی سماج سے اوما بھارتی آتی ہیں ، اسی سماج سے پٹیل بھی آتے ہیں ۔ اوما بھارتی کی وزارتی کونسل سے رخصتی نہیں ہونے پر ذات کی بنیاد پر پرہلاد پٹیل کو وزیر بنانے کا فیصلہ ٹال دیا گیا ۔سیاسی گلیاروں میں زروں سے بحث ہورہی ہے کہ متھرا میں آر ایس ایس کی میٹنگ میں پہنچے امت شاہ کو ہدایت دی گئی تھی کہ اوما بھارتی کو ہر حال میں وزیر بنا کر رکھا جائے ۔ سنگھ لیڈروں کے ذریعہ اوما کو ہٹائے جانے کی مخالف کئے جانے کے بعد پرہلاد پٹیل وزیر بننے کی دوڑ سے باہر ہوگئے ۔ بتایا جارہا ہے کہ امت شاہ نے پرہلاد کو اپنی رہائش گاہ پر بلاکر سبھی صورتحال بتا دی ہیں ۔