ہرشالی نیل کنٹھ جھلکے
جے پور، راجستھان
جے پور کے بابا رام دیو نگر کچی بستی کی رہنے والی شاردا کی 12 سالہ بیٹی پوجا (نام تبدیل) اپنے تین سالہ چھوٹے بھائی کو گود میں لے کر کھلا رہی تھی۔ شاردا پاس ہی کھانا بنا رہی تھی اور پوجا سے کبھی پانی لانے اور کبھی دوسری چیزیں لانے کو کہہ رہی تھی۔ جسے وہ دوڑ دوڑ کر مکمل کر رہی تھی۔ تاہم، شاردا اپنے 8 سالہ بیٹے کو، جو اس کے ساتھ کھیل رہا تھا، کھیل چھوڑ کر چیزیں لانے کو نہیں کہتی۔ تبھی گھر سے باہرپوجا کی سہیلی اسکول سے واپس آتی ہے اور پوجا اسے روکتی ہے اور اس سے اسکول میں پڑھائی کے بارے میں جوش و خروش سے باتیں کرنے لگتی ہے۔ اس کی باتوں سے لگتا تھا کہ اسے پڑھنے کا بہت شوق ہے۔ جب اس کی سہیلی نے اس سے اسکول نہ آنے کی وجہ پوچھی توپوجا سے پہلے اس کی ماں شاردا جواب دیتی ہے کہ،”اگر وہ اسکول جائے گی تو ہمارے پیچھے بچوں کی دیکھ بھال کون کرے گا؟“ماں کا جواب اور پوجا کا مایوس چہرہ ظاہر کرتا تھا کہ تعلیم کے حوالے سے اس کے خواب چکنا چور ہو رہے ہیں۔ 35 سالہ شاردا اور اس کے شوہر یومیہ اجرت والے مزدور ہیں اور راجستھان کے دارالحکومت جے پور شہر سے تقریباً 10 کلومیٹر دور بابا رام دیو نگر کچی آبادی میں رہتے ہیں۔ نیو آتش مارکیٹ میٹرو اسٹیشن سے 500 میٹر کے فاصلے پر واقع اس بستی کی آبادی 500 سے زیادہ ہے۔ یہاں درج فہرست ذاتوں اور درج فہرست قبائل سے تعلق رکھنے والی برادریوں کی اکثریت ہے۔ جس میں لوہار، جوگی، کالبیلیا، میراسی، اسکریپ ورکرز، فقیروں، ڈھول بجانے والوں اور یومیہ اجرت والے مزدوروں کی تعداد زیادہ ہے۔
یہاں رہنے والے تمام خاندان بہتر روزگار کی تلاش میں راجستھان کے دور دراز دیہی علاقوں سے نقل مکانی کر کے آئے ہیں۔ کچھ خاندان یہاں مستقل طور پر آباد ہو گئے ہیں جبکہ کچھ موسم کے مطابق ہجرت کر جاتے ہیں۔ ہجرت کے اس عمل میں سب سے زیادہ نقصان بچوں بالخصوص لڑکیوں کی تعلیم کا ہوتا ہے۔ گھر کی معاشی حالت لڑکوں کے مقابلے لڑکیوں کے مستقبل پر منفی اثرات مرتب کرتی ہے۔ جس کی وجہ سے نہ صرف ان کی تعلیم بلکہ جسمانی اور ذہنی نشوونما بھی رک جاتی ہے۔ جب ماں باپ دونوں کام پر باہر جاتے ہیں تو گھر کی ذمہ داری لڑکی کے کندھوں پر ڈال دی جاتی ہے۔ اپنے چھوٹے بہن بھائیوں کی دیکھ بھال کے ساتھ ساتھ اسے گھر میں پینے کے صاف پانی اور کھانا پکانے کا کام سونپا جاتا ہے۔ اس طرح اس کی تعلیم بہت پیچھے رہ جاتی ہے۔پوجا کی طرح، اس کچی بستی میں رہنے والی ایک اور نوعمر، 14 سالہ آشا (نام بدلا ہوا ہے) کہتی ہے کہ وہ چار بہن بھائیوں میں سب سے بڑی ہے۔ اس کے والدین اسکریپ خریدنے اور بیچنے کے لیے ہر صبح گھر سے نکل جاتے ہیں۔ ان کے پیچھے وہ نہ صرف تمام بہن بھائیوں کا خیال رکھتی ہے بلکہ کھانا پکانے سے لے کر گھر کے دیگر تمام کام بھی سنبھالتی ہے۔ اتنا ہی نہیں جب بھی ماں کسی وجہ سے کام پر نہیں جاتیں تو اس دن آشا کو جانا پڑتا ہے۔ ہر روز وہ گھر یا باہر کسی نہ کسی کام میں مصروف رہتی ہے۔ ایسے میں اسے سکول جانے کا موقع نہیں ملتا ہے۔ آشا کہتی ہیں کہ پانچویں جماعت کے بعد اسے اسکول جانے کا موقع ہی نہیں ملا۔ حالانکہ اسے پڑھنے کا بہت شوق ہے۔ وہ کہتی ہیں کہ جب بھی موقع ملتا ہے وہ اپنی چھوٹی بہنوں اور بھائیوں کی سکول کی کتابیں پڑھنے بیٹھ جاتی ہے۔ وہ کہتی ہیں کہ اس کالونی میں تقریباً تمام لڑکیاں چھٹی یا ساتویں جماعت کے بعد تعلیم بند کر دیتی ہیں۔ وہ پڑھائی چھوڑ کر والدین کی غیر موجودگی میں گھر کی ذمہ داریاں سنبھالنے لگتی ہے۔
اس حوالے سے کالونی کی ایک بزرگ خاتون کانتی کا کہنا ہے کہ ”لڑکی پڑھنے اسکول جائے گی تو گھر کون سنبھالے گا؟ چھوٹی بہنوں اور بھائیوں کا خیال کون رکھے گا؟“تاہم ان کے پاس اس سوال کا کوئی جواب نہیں تھا کہ اگر لڑکا گھر میں بڑا ہے تو وہ بھی گھر میں رہ کر اپنی چھوٹی بہنوں اور بھائیوں کا لڑکیوں کی طرح خیال کیوں نہ رکھ سکتا ہے؟اکھلیش مشرا، ایک سماجی کارکن، جو بابا رام دیو نگر کی کچی آبادی میں صحت اور مختلف سماجی مسائل پر پچھلے آٹھ سالوں سے کام کر رہے ہیں، کہتے ہیں، ”بابا رام دیو نگر جیسے شہری علاقوں میں آباد کچی آبادیوں میں لڑکیوں کو تعلیم دینے کے لیے ابھی بھی بیداری کی کمی ہے۔ اس کے پیچھے بہت سی سماجی اور معاشی وجوہات ہیں، ایک طرف لوگوں کی معاشی حالت اب بھی کمزور ہے اور دوسری طرف ان کے لیے آمدنی کا ذریعہ بنانا بھی بہت ضروری ہے۔ اپنے بچوں کو کام کے لیے لے جانا اور ان سے بچہ مزدوری کرانا بالواسطہ طور پر لڑکیوں کی تعلیم پر منفی اثر دیکھا جاتا ہے، انہیں گھر کے کام اور دیگر ذمہ داریاں دی جاتی ہیں۔ حکومت کی طرف سے لڑکیوں کی تعلیم کو فروغ دینے کے لیے مختلف اسکیمیں اور اسکالرشپ چلائی جا رہی ہیں۔ لیکن بابا رام دیو نگر کی کچی آبادی کی لڑکیوں کی اسکول سے دوری انہیں ان اسکیموں کا فائدہ اٹھانے سے محروم کر رہی ہے۔
انڈیا اسپینڈ کی ایک رپورٹ کے مطابق، ثانوی سطح پر لڑکیوں کے اندراج کی شرح میں کافی بہتری آئی ہے۔ لیکن نوعمر لڑکیوں کی ایک بڑی تعداد اب بھی اسکول سے باہر ہے۔ سال 2021-22 میں، جہاں ملک میں تعلیم کی پرائمری سطح پر لڑکیوں کے سکول چھوڑنے کی شرح 1.35فیصد ہے، وہیں ثانوی سطح پر یہ بڑھ کر 12.25فیصد ہو گئی ہے۔ درحقیقت لڑکیوں کی تعلیم کو فروغ دینے کے لئے نہ صرف اسکیموں کے نفاذ کی ضرورت ہے بلکہ زمینی سطح پر بیداری پھیلانے کی بھی ضرورت ہے۔ سماجی سطح پر لڑکیوں کی تعلیم کے بارے میں آگاہی کی ضرورت ہے تاکہ معاشرہ لڑکوں کی طرح لڑکیوں کی تعلیم کی اہمیت کو سمجھ سکے۔ یہ ایک حقیقت ہے کہ ہمارے ملک میں نوعمر لڑکیوں کو تعلیم حاصل کرنے میں سب سے بڑی رکاوٹ کا سامنا کرنا پڑتا ہے۔ دیہی علاقوں کے علاوہ ملک کے شہری غربت والے علاقوں میں بھی نوعمر لڑکیوں کو تعلیم کے لیے بہت سی جدوجہد سے گزرنا پڑتا ہے۔ تاہم، تعلیم ہر رکاوٹ کو دور کرنے کا سب سے طاقتور ذریعہ ہے۔ لیکن مختلف وجوہات کی بنا پر انہیں تعلیم حاصل کرنے اور بااختیار بننے سے روک دیا جاتا ہے۔ اگرچہ شہری علاقوں میں لڑکیوں کے لیے تعلیم حاصل کرنے میں حائل رکاوٹیں دور ہونا شروع ہو گئی ہیں، لیکن بابا رام دیو نگر جیسے کچی آبادی والے علاقوں کی کالونیوں میں رہنے والی لڑکیوں کو اب بھی تعلیم حاصل کرنے کے لیے جدوجہد کرنی پڑتی ہے۔یہ سلسلہ صرف بیداری اور روزگار کے بہتر مواقع فراہم کر ختم کیا جا سکتا ہے کیونکہ لڑکیوں کی تعلیم ہی ملک کے مستقبل کی بنیادہوتی ہے۔ (چرخہ فیچرس)
