ملوث افراد کی شناخت کر لی ہے، بہت جلد کیفر کردار تک پہنچایا جائے گا: دلباغ سنگھ
پیر ہلال
سرینگر؍؍سرینگر کے خانیار میں اتوار کو ایک مشتبہ جنگجو نے ایک سب انسپکٹر پر نزدیک سے گولیاں چلائیں جس کی وجہ سے ان کی موت واقع ہوئی سرکاری ذرائع نے بتایا کہ خانیار میں اتوار کو دوپہر کے وقت ایک جنگجو نے پولیس سب انسپکٹر ارشد احمد میر ساکن کلمونہ کپوارہ پر نزدیک سے گولیاں چلائیں جس کی وجہ سے وہ خون میں لت پت وہی گر پڑے۔ انہوں نے بتایا کہ اگر چہ زخمی ارشد احمد کو پہلے شری مہاراجہ ہری سنگھ ہسپتال(ایس ایم ایچ ایس) اور پھر شیر کشمیر انسٹی ٹیوٹ آف میڈیکل سائنسز (ایس کے اء ایم ایس)منتقل کیا گیا تاہم وہ زخموں سے جانبر نہ ہو سکے۔اس دوران پولیس نے واقعے کی سی سی ٹی وی فوٹیج جاری کی ہے جس میں ایک مشتبہ جنگجو کو پیچھے سے آ کر راہ چلتے سب انسپکٹر کو بالکل نزدیک سے گولیاں مارتے ہوئے دیکھا جا سکتا ہے۔پولیس ذرائع نے بتایا کہ واقعے کی تحقیقات شروع کر دی گئی ہیں اور تمام چیکنگ پوائنٹس کو الرٹ کیا گیا ہے۔وہیںپولیس سربراہ دلباغ سنگھ نے کہا کہ سری نگر کے خانیار میں پولیس سب انسپکٹر کی ‘ٹارگٹ کلنگ’ میں ملوث افراد کی شناخت کر لی گئی ہے جنہیں بہت جلد کیفر کردار تک پہنچایا جائے گا۔انہوں نے اتوار کی شام یہاں ڈسٹرکٹ پولیس لائنز میں منعقدہ مہلوک سب انسپکٹر ارشد احمد میر کی میت پر پھول مالائیں ڈالنے کی تقریب کے حاشئے پر نامہ نگاروں کو بتایا: ‘ملوثین کی شناخت کر لی گئی ہے۔ انہیں بہت جلد کیفر کردار تک پہنچایا جائے گا’۔پولیس سربراہ نے پولیس افسر کی ہلاکت کو ایک افسوس ناک واقعہ قرار دیتے ہوئے کہا: ‘ہم نے ایک بہادر اور جوان افسر کو کھو دیا ہے۔ وہ پولیسنگ کی باریکیوں کو ابھی سمجھ ہی رہا تھا’۔انہوں نے کہا: ‘وہ ہسپتال ایک ملزم کو دیکھنے کے لئے گیا تھا۔ واپسی پر اسے گولیاں کو نشانہ بنایا گیا۔ اسے فوراً ہسپتال منتقل کیا گیا لیکن وہ زخموں کی تاب نہ لاتے ہوئے دم توڑ بیٹھا’۔دلباغ سنگھ نے وادی میں ‘ٹارگٹ کلنگ’ کے واقعات میں اضافے پر کہا: ‘ہر ایک ہلاکت ہمارے لئے باعث تشویش ہے۔ ایسے واقعات میں ملوث کئی لوگوں کو کیفر کردار تک پہنچایا جا چکا ہے۔ ہماری تحقیقاتی ایجنسیاں آج پیش آنے والے واقعے کی بھی تحقیقات کر رہی ہیں’۔ان کا مزید کہنا تھا: ‘سری نگر میں پستول بردار ایک درجن کے قریب ماڈیولز کا صفایا ہو چکا ہے۔ جب جب پرانی ٹیم کا صفایا ہوتا ہے تو نئی ٹیم ان کی جگہ لینے کی کوشش کرتی ہے۔ نئی ٹیم کی بھی پہنچان لگ بھگ ہو گئی ہے۔ ان کے خلاف بھی کارروائی جلد کی جائے گی’۔واضح رہے کہ سری نگر کے خانیار میں اتوار کو ایک مشتبہ جنگجو نے ایک پولیس سب انسپکٹر پر نزدیک سے گولیاں چلائیں جس کی وجہ سے ان کی موت واقع ہوئی۔
