سینئر ڈاکٹروں کو کووڈ مریضوں کا علاج و معالجہ کرنے کی ہدایت دی
جموں ؍؍لفٹینٹ گورنر منوج سنہا نے آج گورنمنٹ میڈیکل کالج جموں کا اچانک معائینہ کیا اور وہاں داخل کووڈ اور دیگر مریضوں کو فراہم کی جا رہی طبی سہولیات کا جائیزہ لیا ۔
دورے کے دوران لفٹینٹ گورنر نے مختلف طبی شعبوں کا چکر لگایا اور لازمی طبی ساز و سامان اور دیگر طبی آلات کی دستیابی کے بارے میں پوچھ تاچھ کی ۔ انہوں نے ہسپتال انتظامیہ کی جانب سے جاری کووڈ 19 وباء سے نمٹنے کیلئے اٹھائے گئے اقدامات کا بھی جائیزہ لیا ۔ لوگوں کی جانب سے آکسیجن کی قلت سے متعلق شکایات کا نوٹس لیتے ہوئے لفٹینٹ گورنر نے کہا کہ کووڈ وباء کے خلاف لڑائی ہماری اجتماعی ذمہ داری ہے ۔ انہوں نے متعلقہ افسروں کو وسائل کو منظم کر کے موجودہ مسائل کو حل کرنے کیلئے کہا ۔ انہوں نے سینئر ڈاکٹروں کو کووڈ مریضوں کا علاج و معالجہ کرنے کی ہدایت دی ۔ لفٹینٹ گورنر نے ایمر جنسی وارڈ ، ہائی ڈپنڈینسی یونٹ اور دیگر یونٹوں کا معائینہ کرنے کے بعد اعلیٰ افسروں کی ایک میٹنگ منعقد کی ۔
لفٹینٹ گورنر کو جانکاری دی گئی کہ ضرورت کے مطابق آکسیجن کی سپلائی بحال کی گئی ہے اور فی الوقت ہسپتال میں آکسیجن کی کوئی قلت نہیں ہے ۔ دورے کے دوران لفٹینٹ گورنر کے ہمراہ چیف سیکرٹری ، فائنانشل کمشنر صحت ، لفٹینٹ گورنر کے پرنسپل سیکرٹری ، صوبائی کمشنر جموں ، آئی جی پی جموں ، پرنسپل جی ایم سی ، ایڈمنسٹریٹر ایسوسی ایٹڈ ہسپتال اور دیگر اعلیٰ افسران موجود تھے ۔
