42دِنوں کی یاترا23؍ جون 2020ء سے شروع ہوگی
جموں؍؍لیفٹیننٹ گورنر جی سی مرمو جو شری امرناتھ جی شرائین بورڈ ( ایس اے ایس بی) کے چیئرمین بھی ہیں، نے آج یہاں راج بھون میں 37ویں بورڈ میٹنگ کی صدارت کی ۔میٹنگ میں لیفٹیننٹ گورنر کے مشیر آر آر بھٹناگر ، چیف سیکرٹری بی وی آر سبھرامینم اور بورڈ کے ممبران موجود تھے۔یاترا کی تاریخ اور آغاز کے بارے میں میٹنگ میں فیصلہ لیا گیا کہ 42دِنوں کی یاترا 23؍ جون 2020ء سے شروع ہوگی اور 3؍ اگست 2020 ء کو اختتام پذیر ہوگی۔اِس موقعہ پر بتایا گیا کہ سی ای او نے یاتریوں کی رجسٹریشن کے لئے 442 بینکوں کے شاخوں کو نامزد کیا ہے۔اِن بینکوں میں پنجاب نیشنل بینک، جموںوکشمیر بینک اور یَس بینک شامل ہیں۔پیشگی رجسٹریشن کے لئے یکم اپریل 2020ء کی تاریخ مقرر کی گئی ہے۔بورڈ میٹنگ میں فیصلہ لیا گیا کہ یاترا کے بارے میں پروگرام کو بڑے پیمانے پر الیکٹرانک اور پرنٹ میڈیا کے ذریعے تشہیر کی جائے گی۔یاتریوں سے کہا گیا ہے کہ وہ متعلقہ ڈاکٹروں /ہسپتالوں سے ضروری طبی اسناد حاصل کریں۔مرکزی وزارت برائے اطلاعات و نشریات کے تعاون سے بڑے پیمانے پر بیداری مہم جاری رکھی جائے گی اور تمام اطلاعات بورڈ کے ویب سائٹ www.shriamarnathjishrine.com دستیاب رہیں گی۔چیئرمین موصوف نے تمام متعلقین پر زور دیا کہ وہ اس سال یاتریوں کو فراہم کی جارہی سہولیات میں مزید بہتری لائیں۔
