یو این آئی
نئی دہلی// سال 1984 کے سکھ مخالف فسادات کی جانچ کر رہی خصوصی تفتیشی ٹیم (ایس آئی ٹی) نے 186 مقدمات کی تحقیقات کرکے اس کی رپورٹ جمعہ کو ایک مہربند لفافے میں سپریم کورٹ کو سونپ دی۔ عدالت عظمی نے ہی اس ایس آئی ٹی کی تشکیل د ی تھی۔ ایس آئی ٹی کو ان معاملات کی پھر سے جانچ کرنے کا حکم دیا گیا تھا، جنہیں پولیس نے مکمل تفتیش کے بغیر ہی بند کر دیا تھا۔عدالت اس معاملے میں دو ہفتے بعد فیصلہ سنائے گی کہ اسے عام کیا جائے یا نہیں، ساتھ ہی اس میں ایسے کتنے معاملے ہیں جن کی پھر سے جانچ کی جائے ۔اس ایس آئی ٹی ٹیم کی تشکیل گزشتہ سال فروری میں دی گئی تھی جس کی صدارت دہلی ہائی کورٹ کے سابق جج شیو نارائن ڈھینگرا نے کی تھی۔ ان کی ٹیم میں آئی پی ایس افسر راجدیپ سنگھ اور ابھیشیک دلار تھے ۔واضح رہے کہ سی بی آئی نے 186 معاملات کو بند کرنے کا فیصلہ کیا تھا، جس کے خلاف متاثرین نے عدالت میں عرضی دائر کی تھی۔ عدالت کا کہنا ہے کہ جسٹس ڈھینگرا کمیٹی کی جانچ کے بعد یہ فیصلہ کیا جائے گا کہ کیا اسے عرضی گزاروں کے ساتھ اشتراک کیا جائے یا اسے مہربند لفافے میں ہی رکھا جائے ۔اس سلسلے میں اگلی سماعت دو ہفتے بعد ہو گی۔واضح رہے کہ 1984 میں سابق وزیر اعظم اندرا گاندھی کے قتل کے بعدسکھ مخالف فسادات میں صرف دہلی میں ہی 2733 افراد مارے گئے تھے وہیں کل 3325 لوگ اس فساد میں اپنی جان گنوا چکے تھے ۔پہلے عدالت نے ایک سپروائزری کمیٹی تشکیل دی تھی۔ اس کمیٹی نے پہلے ایس آئی ٹی کے ذریعہ کی گئی جانچ کا جائزہ لیا تھا۔ پرانی ایس آئی ٹی نے 1984 میں ہوئے سکھ مخالف فسادات معاملے میں درج 294 کیس میں سے 186 کو بغیر کسی تحقیقات کے بند کر دیا تھا، جس پر اعتراض ظاہر کیا گیا تھا۔
