ہمارے لیے ہر سیریز خاص : راشد

لکھنؤ، تین04 نومبر (یو این آئی ) ویسٹ انڈیز کے خلاف چھ نومبر سے شروع ہونے والی تین میچوں کی ایک روزہ سریز سے پہلے افغانستان کے کپتان راشد خان نے اتوار کو کہا کہ میدان پر حریف ٹیم کی صلاحیت کے اندازہ کی پرواہ کئے بغیر ان کی ٹیم کا مقصد اپنی بہترین کارکردگی کا مظاہرہ کرنا ہوگا۔گھریلو میدان کے طور پر لکھنؤ کے اٹل بہاری واجپئی اکانا اسٹیڈیم میں اپنا پہلا میچ کھیلنے جارہی افغانستان ٹیم کے کپتان راشد نے صحافیوں سے کہا کہ ہمارے لیے ہر سریز اہم ہے ۔ یہ معنی نہیں رکھتا کہ ہمارا حریف کون ہے ۔ ہمارے کھیل کی سطح اب اوپر اٹھ رہی ہے تو ہر سیریز ہمارے لیے اہم ہے اور یقینی طور پر ہمارے کھلاڑی جیت کے مقصد کے ساتھ میدان پر اتریں گے ۔ انہوں نے کہا کہ سب سے اہم بات یہ ہے کہ ہمارے سامنے ایشیا کپ اور ٹی 20 عالمی کپ جیسے دو بڑے ٹورنامنٹ ہیں، لہذا ہر سیریز اہم ہے اور ہمیں سریز در سریز اپنی کارکردگی کو بہتر بنانے پر توجہ مرکوز کرنے کی ضرورت ہے ۔ راشد نے کہا کہ ہماری منصوبہ بندی مضبوط ٹیموں کے ساتھ کھیلنا ہے ، کیونکہ اس سے ہمیں کارکردگی کو بہتر بنانے کا موقع ملے گا اور ہم اہم مقابلوں میں مزید اعتماد کے ساتھ اتریں گے ۔ بہترین ٹیموں کے خلاف کھیلنے میں ہمیں بہت کچھ سیکھنے کو ملے گا۔ میچ در میچ ہمیں پتہ چلے گا کہ کن کن شعبوں میں بہتری لانا ہے ۔ انہوں نے کہا کہ اسپن گیند بازوں کے موافق حالات میں ان کی ٹیم کو ویسٹ انڈیز پر برتری حاصل ہے ۔ مگر ساتھ ہی یہ بھی کہا کہ صرف پچ کے بھروسے ہی نہیں رہا جا سکتا۔ آپ کو ہر حال میں محنت کرنی پڑتی ہے ۔ ہمارے پاس بہترین اسپن اٹیک ہے لیکن اس کے لئے میدان میں خود کو ثابت کرنا ہوگا۔ راشد نے ایک سوال پر کہا کہ افغانستان کے کوچ لانس کلسنر انتہائی تجربہ کار کوچ ہیں۔ انہوں نے جنوبی افریقہ کے لیے کافی کرکٹ کھیلا ہے ۔ خوشی ہے کہ وہ ہمارے ساتھ ہیں۔ اس سیریز میں ان کے تجربے کا افغان ٹیم کو کافی فائدہ ملے گا۔بہت کم وقت میں ہی دنیا کے چوٹی کے اسپن بولنگ میں اپنا نام درج کرانے والے راشد نے کہا کہ انہوں نے ویسٹ انڈیز کے کسی بھی کھلاڑی کے لیے خاص حکمت عملی نہیں بنائی ہے ۔ میں نے اپنے لئے منصوبہ بنایا ہے ۔ اگر کسی کھلاڑی کے لیے تیاری کی تو میری لائن اور لینتھ بگڑ جائے گی۔افغان ٹیم کی مدد کرنے کے لیے ہندستان کا شکریہ ادا کرتے ہوئے راشد نے کہا کہ ہمیں ہمیشہ ہندستان سے مدد ملی ہے ۔ ہم نے ہمیشہ ان کے شکرگزار رہیں گے ۔ افغانستان کے کوچ لانس کلسنر نے اس موقع پر کہا کہ ہماری ترجیح ایک ٹیم کے طور پر خود کو اور اسمارٹ بنانے کی ہے ۔ ہماری ٹیم میں کافی باصلاحیت کھلاڑی ہیں لیکن ہم اس بات پر خاص توجہ دیں گے کہ ہم میچ کے رخ کو بہتر طریقے سے سمجھیں اور میچ جیتنے کے لئے بہتر حکمت عملی بنا کر اس پر عمل کریں۔