لازوال ویب ڈیسک
ممبئی، //اعجاز پٹیل (چھ وکٹ) اور گلین فلپس (تین وکٹ) کی شاندار گیند بازی کی بنیاد پر نیوزی لینڈ نے تیسرے ٹیسٹ میچ کے تیسرے دن اتوار کے روز ہندوستان کو 25 رنز سے شکست دے دی، اس جیت کے ساتھ ہی نیوزی لینڈ نے تین ٹیسٹ میچوں کی سیریز بھی 3-0 سے جیت لی ہے۔
لنچ کے بعد جیت کی طرف بڑھ رہے ہندوستان کو 22ویں اوور میں اعجاز پٹیل نے رشبھ پنت (64) کو آؤٹ کر کے دھچکا دیتے ہوئے نیوزی لینڈ کی میچ میں واپسی کرادی۔ پنت نے اپنی اننگ میں نو چوکے اور ایک چھکا لگایا۔ اس کے بعد اشون اور واشنگٹن سندر نے اننگز کو سنبھالنے کی کوشش کی۔ لیکن گلین فلپس نے اشون (آٹھ) اور اسی اوور میں آکاش دیپ (صفر) کو آؤٹ کرکے ہندوستان کی امیدوں پر پانی پھیر دیا۔ 30 ویں اوور میں اعجاز نے واشنگٹن سندر (12) کو بولڈ کر کے ہندوستانی اننگ 121 پر ختم کر دی اور میچ 25 رنوں سے جیت لیا۔ اس کے ساتھ ہی نیوزی لینڈ نے تین میچوں کی سیریز 3-0 سے جیت لی۔ یہ پہلا موقع ہے جب ہندوستان اپنے گھر پر ٹیسٹ سیریز ہارا ہے۔ اس شکست سے عالمی ٹیسٹ چیمپئن شپ کے پوائنٹس ٹیبل میں ہندوستان کو بڑا دھچکا لگے گا۔
نیوزی لینڈ کو دوسری اننگ میں 174 رنز پر آؤٹ کرنے کے بعد بلے بازی کرنے اتری ہندوستانی ٹیم کی شروعات انتہائی خراب رہی اور اس نے 29 کے اسکور پر ایک کے بعد اپنے پانچ وکٹ گنوادیے۔ کپتان روہت شرما 11، شبمن گل ایک، یشسوی جیسوال 5 اور وراٹ کوہلی ایک رن بناکر آؤٹ ہوئے۔ اس کے بعد رویندر جڈیجہ نے رشبھ پنت کے ساتھ اننگ کو سنبھالا۔ دونوں کے درمیان 42 رنز کی شراکت ہوئی۔ 16ویں اوور میں اعجاز پٹیل نے ول ینگ کے ہاتھوں جڈیجہ (6) کو کیچ کروا کر اس شراکت کو توڑ دیا۔ اس کے بعد بلے بازی کے لیے آئے واشنگٹن سندر نے پنت کے ساتھ اننگ کو سنبھالا۔ اس دوران رشبھ پنت نے اپنی نصف سنچری مکمل کی۔ پنت نے 50 گیندوں میں سات چوکے اور ایک چھکا لگاتے ہوئے (ناٹ آؤٹ 53) بنالئے۔
نیوزی لینڈ کی جانب سے اعجاز پٹیل نے 6 وکٹیں حاصل کیں۔ گلین فلپس کو تین وکٹ ملے۔ میٹ ہنری نے ایک بلے باز کو آؤٹ کیا۔
اس سے قبل رویندر جڈجہ اور اشون کی شاندار گیند بازی کی بدولت ہندوستان نے نیوزی لینڈ کو دوسری اننگ میں 174 رنز پر آؤٹ کر دیا۔ اس کے ساتھ ہی ہندوستان کو مشکل پچ پر میچ جیتنے کے لیے 147 رنز کا ہدف ملا ہے۔ آج یہاں وانکھیڑے میں، نیوزی لینڈ نے کل کے 171 کے اسکور سے آگے کھیلنا شروع کیا۔ اسکور میں ابھی چار رنز کا اضافہ ہوا تھا جب رویندرا جڈیجہ نے آکاش دیپ کے ہاتھوں اعجاز پٹیل (8) کوکیچ آؤٹ کراتے ہوئے نیوزی لینڈ کی دوسری اننگ کا 45.5 اوورز میں 174 کے اسکور پر خاتمہ کردیا۔
دوسرے دن ہندوستان کی پہلی اننگ کے 263 رنز کے جواب میں مہمان ٹیم نے نو وکٹوں پر 171 رنز بنالئے تھے۔ نیوزی لینڈ نے پہلی اننگز میں 235 رنز بنائے تھے۔ ہندوستان نے پہلی اننگ میں 263 رنز بناکر 28 رنز کی برتری حاصل کر لی تھی۔ دوسری اننگ میں رویندر جڈیجہ نے سب سے زیادہ پانچ وکٹیں حاصل کیں۔ جبکہ روی چندرن اشون نے تین وکٹ جھٹکے۔ آکاش دیپ اور واشنگٹن سندر کو ایک ایک وکٹ ملا۔
