گوا اور بنگلور میں آئی ایس ایل کا فائنل مقابلہ

یواین آئی
فاتوردا، ´// ایف سی گوا کو ہیرو انڈین سپر لیگ (آئی ایس ایل) کے پانچویں سیزن کے دوسرے سیمی فائنل کے دوسرے مرحلے کے میچ میں ممبئی سٹی ایف سی نے ایک۔صفرسے ہرا دیا. لیکن گوا کی ٹیم پہلے مرحلے کی بڑی جیت کی بدولت فائنل میں جگہ بنا نے میں کامیاب رہی۔ گوا نے ممبئی میں کھیلے گئے پہلے مرحلے کے میچ میں پانچ۔ایک سے کامیابی حاصل کی تھی۔ اسی وجہ سے وہ دو مرحلے کے اختتام کے بعد پانچ۔ دو کے مجموعی اسکور کے ساتھ فائنل میں پہنچی۔ فائنل میں اس کا سامنا اتوار کو بنگلور ایف سی سے ہوگا۔ بنگلور نے نارتھ ایسٹ کو شکست دے کر مسلسل دوسری بار فائنل میں داخلہ حاصل کیا۔ ممبئی کو پتہ تھا کہ پہلے مرحلے میں ملی ایک۔پانچ سے ہار کے بعد اس کے فائنل میں جانے کا امکان کافی کم ہے لیکن وہ کوشش میں کوئی کسر نہیں چھوڑنا چاہتی تھی۔لہذا وہ صرف گول کرنے کے ارادے سے اتری تھی۔منگل کو کھیلے گئے میچ کے چھٹے منٹ میں اسے کامیابی بھی مل گئی۔ رافیل باستوس نے ممبئی کو ایک۔صفر سے آگے کر دیا لیکن ممبئی اس کے بعد اپنے اسکور میں کوئی اضافہ نہیں کر پائی۔ اس سے پہلے بنگلور ایف سی نے اپنے گھر شری کانتی روا اسٹیڈیم میں کھیلے گئے پہلے سیمی فائنل کے دوسرے مرحلے کے میچ میں نارتھ ایسٹ یونائٹیڈ کو شکست دے کر فائنل میں داخلہ حاصل کیا تھا۔ یہ مسلسل دوسری بار ہے کہ بنگلور نے فائنل میں جگہ بنائی ہے ۔ وہ گزشتہ سال بھی فائنل میں پہنچی تھی لیکن جیت نہیں سکی تھی۔ بنگلور نے چار۔دو کے مجموعی اسکور کے ساتھ فائنل میں داخلہ حاصل کیا ہے ۔ گوہاٹی میں کھیلے گئے پہلے مرحلے میں اسے ایک دو سے شکست ملی تھی، لیکن پیر کو اپنے گھر میں اس نے 3-0 سے کامیابی حاصل کی اور کل چار گول کی مدد سے فائنل میں جگہ یقینی کی۔ دو مرحلے کے بعد نارتھ ایسٹ کے مجموعی اسکور کی تعداد دو ہی رہی اور اس وجہ سے پہلی بار پلے آف میں جگہ بنانے والی یہ ٹیم فائنل میں جانے سے چوک گئی۔یواین آئی