پٹنہ، // بہار میں سب سے زیادہ نو بار وزیر اعلی بننے والے نتیش کمار کی سیاسی پرواز، پروان چڑھنے سے پہلے کی رک گئی تھی۔
نتیش کمار نے اپنے سیاسی کیرئیر کا آغاز 1977 میں جے پی تحریک میں ہرنوت اسمبلی سے کیا تھا۔ ہرنوت اسمبلی حلقہ مکمل طور پر تال علاقے میں آتا ہے اور موکاما کے بعد یہ ٹال علاقہ دالوں اور تلہن کے لیے مشہور ہے۔ انہوں نے ٹال کے علاقے کو ایشو بنا کر سیاست میں قدم رکھا تھا۔
سال 1977 میں ہرنوت اسمبلی حلقہ سے نتیش کمار نے جنتا پارٹی کے ٹکٹ پر الیکشن لڑا لیکن وہ آزاد بھولا پرساد سنگھ سے ہار گئے۔ مسٹرکمار نے 1980 میں بھی ہرنوت اسمبلی حلقہ سے الیکشن لڑا لیکن اس بار بھی انہیں شکست کا سامنا کرنا پڑا۔ جنتا پارٹی (سیکولر) کے ٹکٹ پر الیکشن لڑ رہے مسٹر کمار کو اس بار آزاد امیدوار ارون کمار سنگھ نے شکست دے دی۔ بتایا جاتا ہے کہ لگاتار دو شکستوں کے بعد مسٹر کمار نے فیصلہ کیا تھا کہ وہ اب الیکشن نہیں لڑیں گے۔
1985 کے اسمبلی انتخابات میں مسٹرکمار نے ایک بار پھر ہرنوت سے الیکشن لڑنے کے لئے اترے۔ اس بار ان کی قسمت چمک گئی۔ لوک دل کے امیدوار نتیش کمار نے کانگریس کے برجانندن پرساد سنگھ کو شکست دی اور پہلی بار اسمبلی میں پہنچے۔ اس کے بعد انہوں نے اسمبلی الیکشن نہیں لڑا۔ ہرنوت سیٹ کو مسٹر کمار کا ناقابل تسخیر قلعہ سمجھا جاتا ہے۔ سال 2005 سے لے کر اب تک ہونے والے انتخابات میں ان کی پارٹی جنتا دل یونائیٹڈ (جے ڈی یو) کے امیدوار یہاں سے مسلسل جیتتے رہے ہیں۔
مسٹرکمار نے سال 1989 میں باڑھ پارلیمانی حلقے سے الیکشن لڑا اور پہلی بار جیت کر پارلیمنٹ پہنچے۔ اس کے بعد انہوں نے باڑھ پارلیمانی سیٹ سے 1991، 1996، 1998 اور 1999 میں لگاتار پانچ بار لوک سبھا انتخابات میں کامیابی حاصل کی۔ سال 2004 میں انہوں نے دو جگہوں باڑھ اور نالندہ سے لوک سبھا کا الیکشن لڑا۔ مسٹر کمار نے نالندہ میں کامیابی حاصل کی لیکن باڑھ میں انہیں شکست کا سامنا کرنا پڑا۔ راشٹریہ جنتا دل (آر جے ڈی) کے وجے کرشنا نے جنتا دل کے نتیش کمار کو شکست دی تھی۔ اس کے بعد سے مسٹر کمار نے نہ تو اسمبلی اور نہ ہی لوک سبھا کا الیکشن لڑا ہے۔ مسٹر کمار اٹل بہاری واجپائی کی حکومت میں سرفیس ٹرانسپورٹ، وزیر زراعت اور ریلوے کے وزیر بھی رہ چکے ہیں۔
نتیش کمار 3 مارچ 2000 کو پہلی بار بہار کے وزیر اعلیٰ بنے۔ تاہم اکثریت نہ ہونے کی وجہ سے انہوں نے سات دن کے اندر استعفیٰ دے دیا۔ اس کے بعد رابڑی دیوی کی حکومت گرنے کے بعد نتیش کمار 24 نومبر 2005 سے اب تک آٹھ بار وزیر اعلیٰ بن چکے ہیں۔ درمیان میں 20 مئی 2014 سے 22 فروری 2015 تک نتیش کمار نے جیتن رام مانجھی کو وزیر اعلیٰ بنایا تھا۔
