ماحولیات کے ساتھ ہم آہنگ توازن کیلئے ٹرانسپورٹیشن کی خدمات کو بہتر بنانے کی خاطرسمارٹ موبلٹی ہماری اوّلین ترجیح ہے:سنہا
لازوال ڈیسک
سری نگر؍؍لیفٹیننٹ گورنر منوج سِنہانے سری نگر الیکٹرک بس پروجیکٹ کے تحت سری نگر سمارٹ سٹی کی 100 الیکٹرک بسوں کا آغاز کیا اور آج نشاط بس ٹرمینل پر 75 اِی۔ بسوں کے بیڑے کو ہری جھنڈی دکھا کر روانہ کیا۔اِی۔ بسیں 15 انٹر سٹی روٹوں اور 2 انٹر سٹی روٹوں پر چلیں گی اور صبح 8 بجے سے شام 8 بجے تک کم از کم 200 کلومیٹر فی دن چلیں گی۔اِس موقعہ پر لیفٹیننٹ گورنر نے اَپنے خطاب میں سری نگر سمارٹ سٹی لمیٹڈ اور سری نگر اور ملحقہ اَضلاع کے رہائشیوںکو مُبارک پیش کی۔اُنہوں نے کہا ،’’ماحولیات کے ساتھ ہم آہنگ توازن کے لئے ٹرانسپورٹیشن کی خدمات کو بہتر بنانے کے لئے سمارٹ موبلٹی ہماری اوّلین ترجیح ہے۔ 100 اِی۔ بسوں کا اضافہ وزیر اعظم نریندر مودی جی کے ویژن کے مطابق کاربن نیوٹرلٹی حاصل کرنے کی خاطر ایک بڑی کامیابی ہے۔‘‘لیفٹیننٹ گورنرنے کہا کہ سری نگر سمارٹ سٹی لمیٹڈ لوگوں کوبہتر ٹرانسپورٹیشن فراہم کرنے اور معاشرے کی پائیداری میں اَپنا کردار اَدا کرنے کے لئے مربوط نقطہ نظر کے ذریعے ’’ماڈل شفٹ‘‘ کے تصور کو حقیقت میں تبدیل کر رہا ہے۔اُنہوں نے کہا کہ آج لوگوں کے لئے وقف کردہ اِی۔ بسیں اس بات کو یقینی بنائیں گی کہ روزانہ مسافروں اور دفتر جانے والوں کو سری نگر شہر اور اس سے منسلک اَضلاع کے لئے قابل اعتماد، سستی، دیرپا اور محفوظ پبلک ٹرانسپورٹ سسٹم تک رسائی حاصل ہو۔لیفٹیننٹ گورنر نے اَفسروں کو ہدایت دی کہ وہ اس بات کو یقینی بنائیں کہ اِی۔ بسوں کے لئے مخصوص چارجنگ سٹیشن سال بھر فعال رہیں۔لیفٹیننٹ گورنرمنوج سِنہا نے آغازی تقریب میں جموںوکشمیر یوٹی میں شہری ٹرانسپورٹ کو بہتر بنانے میں مدد اور تعاون کے لئے مرکزی حکومت کا شکریہ اَدا کیا ۔ اُنہوں نے کہا کہ جلد ہی سری نگر اورجموں میں میٹر وریل کا خواب حقیقت بن جائے گا۔اِی۔بسیںیونیورسل ایکسیس اور ایچ وِی اے سی ( ہیٹنگ، وینٹی لیشن اور ایئر کنڈیشننگ) سسٹم، آن بورڈ وہیکل ٹریکنگ سسٹم، سی سی ٹی وی اور ایمرجنسی سٹاپ کی سہولیت سے لیس ہیں۔مسافروں کی سہولیت کے لئے ایک مخصوص موبائل ایپ اور آن لائن ٹکٹ کی ادائیگی کی سہولیت تیار کی گئی ہے۔ تمام بسیں سری نگر سمارٹ سٹی کے انٹگریٹیڈ کمانڈ اینڈ کنٹرول سینٹر کے ساتھ مربوط ہیں۔پانتھہ چوک پر ایک بس ڈیپو قائم کیا جارہا ہے اور اِی۔ بسوں کو آسانی سے چلانے کے لئے چارجنگ سب سٹیشن تیار کئے گئے ہیں۔اِس موقعہ پر میئر ایس ایم سی جنید عظیم متو، پرنسپل سیکرٹری مکانات و شہری ترقی محکمہ پرشانت گوئیل ، صوبائی کمشنر کشمیر وِجے کمار بِدھوری ، سی اِی او سری نگر سمارٹ سٹی لمٹیڈ اطہر عامر خان، سیکرٹری محکمہ ٹرانسپورٹ جی پرسنا راما سوامی ، یوایل بی ممبران ، سول اِنتظامیہ اور ٹاٹا موٹرز کے اَفسران اور ممتاز شہری موجود تھے۔
