پونچھ کے عوام نے پیش کی مبارک باد، نیک خواہشات سے نوازا
لازوال ڈیسک
پونچھ؍؍ یوتھ نیشنل کانفرنس جموں کے صوبائی صدر اور سابق ایم ایل اے حویلی پونچھ اعجاز جان کو عمرہ ادا کرنے کے بعد جموں و کشمیر واپس آنے پر پارٹی کارکنوں اور ضلع پونچھ کے سرکردہ افراد نے مبارکباد دی۔اپنے عمرہ کے دوران، اعجاز جان نے بتایا کہ انہوں نے ڈاکٹر فاروق عبداللہ اور عمر عبداللہ کے ساتھ ملک کے بالعموم اور جموں و کشمیر کے لوگوں کی بالخصوص امن و خوشحالی کے لیے دعا کی۔ انہوں نے یہ بھی دعا کی کہ ریاست جموں و کشمیر میں ہمیشہ امن قائم رہے۔
تاہم اظہار تشکر کرتے ہوئے، اعجاز جان نے پارٹی کے تمام کارکنان سے کہا ہے کہ وہ ہر سطح پر پارٹی کی بنیاد کو مضبوط کرنے کے لیے کام کریں اور جموں و کشمیر کو درپیش بڑے چیلنج سے نمٹنے کے لیے تیار ہوں۔ انہوں نے کہا کہ پارٹی کی جڑیں جموں و کشمیر کے کونے کونے میں گہری ہیں۔ انہوں نے کہا کہ وہ لوگوں تک پہنچیں اور ان کے مسائل کے حل میں ان کی مدد کریں۔سابق رکن اسمبلی نے کہا کہ نیشنل کانفرنس ایک عوامی تحریک ہے جو کئی دہائیوں سے جموں و کشمیر کے لوگوں کی خدمت کے لیے وقف ہے۔
انہوں نے کہا کہ پارٹی ان تمام عوامی جذباتی سیاسی کارکنوں کے لئے ایک فطری منزل ہے جو جموں و کشمیر کو امن اور ترقی کی طرف لے جانا چاہتے ہیں۔سینئر این سی لیڈر نے کہا کہ جموں و کشمیر ایک مشکل دور سے گزر رہا ہے اور وقت کی ضرورت ہے کہ اسے امن اور ترقی کی طرف لے جانے کے لئے ڈاکٹر فاروق عبداللہ اور عمر عبداللہ کے ہاتھ مضبوط کریں۔ انہوں نے ضلع پونچھ کے لوگوں سے اپیل کی کہ وہ نیشنل کانفرنس کی مکمل حمایت کریں اور جموں و کشمیر کی مساوی ترقی کے لیے آنے والے انتخابات میں سامنے آئیں۔
