یواین آئی
حیدرآبادمولانا آزاد نیشنل اردو یونیورسٹی،حیدرآباد میں ایم۔ اے اسلامک اسٹڈیز میں داخلے جاری ہیں۔ یہ کورس دینی مدارس کے فارغین اور عصری تعلیم کے نوجوان طلبہ و طالبات کے لئے موجودہ وقت کے تناظر میں انتہائی اہمیت کا حامل ہے ۔ ڈاکٹر محمد فہیم اختر، صدر شعبہ کے بموجب اس کورس کے نصاب میں علوم اسلامیہ قرآن و حدیث اور فقہ و تصوف کے تقابلی مطالعہ کے علاوہ اسلام کی طویل تہذیبی و تمدنی تاریخ ، ہندوستان میں اسلام اور مسلمانوں کے ہمہ جہتی مطالعہ ، عالم اسلام کی معروف اسلامی تحریکات ، مشہورمفکرین و مصلحین کی خدمات، اسلامی علوم کے میدانوں میں مستشرقین اور دیگر غیر مسلموں کی خدمات کے مطالعہ اور تنقیدی جائزہ ، نیز سائنس و ٹکنالوجی کے میدانوں میں مسلم علماءاور سائنس دانوں کے علمی کارناموں کے تحقیقی اور تجزیاتی مطالعہ کے ساتھ موجودہ دور میں پوری دنیا میں پھیلے مسلمانوں کی تاریخ و احوال اور مسائل و نظریات کا مطالعہ کرایا جاتا ہے ۔یہ کورس دو سالہ ہے جو ریگولر تعلیم کے تحت حیدرآباد کیمپس میں جاری ہے ۔ اس کورس میں طلبہ کو اسلامیات کے ساتھ انگریزی زبان اور کمپیوٹر کی تعلیم بھی دی جاتی ہے ۔نیز انھیں نئے CBCS تعلیمی نظام کے تحت اپنی پسند کے اعتبار سے سیاسیات، سماجیات اور معاشیات کے بشمول یونیورسٹی میں دستیاب کسی دوسرے مضمون کی بھی تعلیم دی جاتی ہے ۔ اس کورس کی تکمیل کے ساتھ ہی حکومت ہند کے منعقدکردہ UGC NETکے مسابقہ جاتی امتحان میں شامل ہوکر تقرری کی اہلیت یا JRFکوالی فائی کر کے ماہانہ فیلوشپ کا استحقاق بھی حاصل کیاجاسکتا ہے ۔اس کورس میں داخلہ کی اہلیت 40 فیصد نمبرات کے ساتھ کسی بھی یونیورسٹی سے گریجویشن یا ان مدارس کی اسناد ہیں جو مانو میں داخلہ کے لئے تسلیم شدہ ہیں۔ اس کے علاوہ ملک کے 50 سے زائد دینی مدارس کی اسناد ایم۔اے کے مختلف کورسز میں داخلہ کے لئے تسلیم کی گئی ہیں، جس کی تفصیل مانو کے ویب سائٹ پر دیکھی جاسکتی ہے ۔ داخلہ کے لئے مردوں کی حدِ عمر 35 سال جبکہ خواتین کی 40 سال ہے ۔یونیورسٹی میں طلبہ و طالبات کے لئے ہاسٹل کی سہولت بھی مہیا ہے ۔ 200 ایکڑ کے خوبصورت احاطہ میں واقع اس یونیورسٹی کے اندر وسیع لائبریری ، متنوع علمی و ثقافتی پروگرامس ، ورزش اور کھیل کود کی معیاری سہولیات کے علاوہ مستقبل کی فکری تربیت اور مسابقہ جاتی امتحانات کی تیاری کے بھی بہترین مواقع دستیاب ہیں۔ داخلہ کی آخری تاریخ 9جولائی ہے ۔ داخلہ صرف آن لائن ہے جس کے لئے ویب سائٹ www.manuu.ac.in پر رہنمائی دستیاب ہے ۔ مزید معلومات کے لئے آفس کے فون 040-23008364 ، ڈاکٹرمحمد فہیم اختر 9885775629 اور ڈاکٹرمحمد عرفان احمد 9010849380 سے رابطہ قائم کیا جاسکتاہے ۔
