ضلع ترقیاتی کمشنر راجوری نے باغبانی و پولٹری کے شعبوں میں کامیابیوں کا جائزہ لیا
شیراز چوہدری
راجوری؍؍ ضلع ترقیاتی کمشنر راجوری وکاس کنڈل نے ضلع میں باغبانی اور پولٹری اور انڈے کی پیداوار کو دوگنا کرنے پر زور دیا ۔ضلع ترقیاتی کمشنر نے ضلع میں جڑواں سیکٹروں میں ریکارڈ کی گئی کامیابیوں کا جائزہ لینے کے لیے ایک میٹنگ کی صدارت کی پولٹری سیکٹر کا جائزہ لیتے ہوئے پولٹری ڈیولپمنٹ آفیسر راجوری ڈاکٹر محفوظ احمد ٹاک نے بتایا کہ سال 2021 میں ضلع میں 2326 ٹن پولٹری اور 2.88 لاکھ انڈوں کی پیداوار ریکارڈ کی گئی ۔انہوں نے مزید کہا کہ ضلع میں اب تک تقریباً 24500 انڈے والے چوزے تقسیم کیے جا چکے ہیں ۔انہوں نے یہ بھی بتایا کہ ضلع میں 10 پرائیویٹ مرغ فارموں کے علاوہ حکومت کے پاس 7000 چوزوں کی گنجائش والے 2 فارم ہیں ۔ضلع ترقیاتی کمشنر نے بہتر اور منظم مارکیٹ کے لیے ضلع میں پولٹری اور انڈا کوآپریٹو سوسائٹیوں کی تشکیل کے لیے کہا میٹنگ میں یہ بھی فیصلہ کیا گیا کہ محکمہ پولٹری کی نسل کو ضلع میں آزمائشی بنیادوں پر متعارف کرائے گا اور کسانوں میں رعائتی داموں پر چوزے تقسیم کیے جائیں گے ۔چیف ہارٹی کلچر آفیسر نے بتایا کہ باغبانی کی پیداوار گزشتہ مالی سال کے 3800 ٹن کے مقابلے اس سال 6000 ٹن تک جائے گی ۔انہوں نے کہا کہ ضلع میں 04 کام کرنے والی سرکاری نرسریاں ہیں اور سرکاری نرسریوں میں 3.00 لاکھ پکنوٹ کے پودے تیار کیے گئے ہیں۔انہوں نے مزید بتایا کہ ضلع میں کیلیفورنیا اسٹرابیری متعارف کرائی گئی ہے اور ضلع کے مختلف علاقوں میں کل 200 کنال اراضی اسٹرابیری کی کاشت کے تحت ہے اور 12 ٹن اسٹرابیری پیدا کی گئی ہے ۔انہوں نے یہ بھی بتایا کہ بہروٹ میں الٹرا ہائی ڈینسٹی ایپل پلانٹیشن ایک بہت کامیاب منصوبہ ہے اور محکمہ اس کے تحت رقبہ بڑھانے کے لیے کام کر رہا ہے۔ اس میٹنگ میں سی پی او محمد خورشید نے بھی شرکت کی۔
