اینکر سے تنازع کے بعد لائیو پروگرام سے باہر گئے شعیب اختر

یواین آئی

اسلام آباد؍؍سابق پاکستانی تیز گیند باز شعیب اختر ایک بار پھر تنازعے کے شکار ہوگئے۔در اصل معاملہ ان کے لائیو پروگرام میں اینکر سے تو تو میں میں اور بعد میں پروگرام سے اٹھ کر چلے جانے کا ہے۔ اس تنازع سے متعلق ویڈیو سوشل میڈیا پر خوب وائرل ہورہے ہیں۔پاکستانی ٹیم کی کل شارجہ کے میدان میں ٹی 20 عالمی کپ میچ میں نیوزی لینڈ پر جیت کے بعد شعیب آج یہاں پاکستان کے اہم ٹی وی چینل پی ٹی وی اسپورٹس پر ایک ڈبیٹ میں شامل ہوئے تھے۔ اس بحث میں ان کے علاوہ سر ووین رچرڈس، ڈیوڈ گاوور، عمر گل، راشد لطیف، عاقب جاوید اور پاکستان خاتون ٹیم کی کپتان ثنا میر بھی موجود تھیں جب کہ شو کی میزبانی مشہور اینکر نعمان نیاز کررہے تھے۔اس دوران نعمان نے شعیب کو کچھ ایسا کہا جس پر وہ برا مان گئے۔ بات بڑھتی دیکھ کر نعمان نے شعیب کو پروگرام کے دوران ہی پروگرام سے باہر جانے کو کہہ دیا۔اس کے بعد شعیب نے فوراً اپنا مائیک اتارا اور پی ٹی وی چینل کے کرکٹ تجزیہ کار کے عہدے سے استعفا دینے کی بات کہتے ہوئے اسٹوڈیو سے باہر چلے گئے۔ حیرت کی بات ہے کہ اس کے بعد نعمان نے انہیں واپس بلانے کی بھی کوشش نہیں کی اور نہ ہی کسی رد عمل کا ظہار کیا اور حسب معمول پروگرام کو جاری رکھا۔در اصل شعیب اختر اس مباحثہ میں شاہین شاہ، آفریدی اور حارث رؤف کے سلسلے میں کچھ بات کررہے تھے۔ اسی درمیان ڈاکٹر نعمان نے ان سے کہا کہ آپ کچھ بے رخی سے بات کررہے رہیں، میں یہ نہیں کہنا چاہتا کہ آپ اوور اسمارٹ بن رہے ہیں، تو آپ جاسکتے ہیں۔ اس کے بعد شعیب نے کہا کہ اس بات کو یہ یہیں ختم کریں، میں آپ کے خلاف کچھ نہیں کہہ رہا تھا جو موضوع تھا اسی پر بات کررہا تھا۔ا سکے بعد شعیب اختر نہیں رکے اور انہوں نے لائیو ٹی وی پر ہی اپنے استعفا کا اعلان کردیا۔ شعیب نے کہا کہ میں پی ٹی وی سے استعفا دے رہا ہوں جس طرح سے میرے ساتھ نیشنل ٹی وی پر سلوک کیا گیا، مجھے نہیں لگتا کہ مجھے یہاں رہنا چاہئے۔اس پورے تنازع کے بعد شعیب نے ٹویٹر پر ایک ویڈیو جاری کرتے ہوئے کہا کہ میں نے ڈاکٹر نعمان سے معافی مانگنے کے لیے کہا تھا لیکن انہوں نے ایسا نہیں کی۔ غیر ملکی کھلاڑیوں کے سامنے میرے ساتھ اس طرح کا سلوک کیا گیا جو میرے لیے کافی برا تھا۔ میں ایک نیشنل اسٹار ہو لیکن جس طرح مجھے باہر جانے کو کہا گیا وہ پوری طرح سے غلط تھا۔ ویوین ریچرڈس اور ڈویڈ گوور جیسے قدآور کرکٹروں کے سامنے میرے ساتھ ایسا سلوک کیا گیا جو بالکل بھی ٹھیک نہیں ہے۔