جموںخطے میں نئی سپون پروڈکشن لیبارٹریاں قائم کرنے کی ضرورت پریا زور
لازوال ڈیسک
سری نگر؍؍لیفٹیننٹ گورنر کے مشیر فاروق خان نے تمام شراکت داروں پر زور دیا کہ وہ مشروم کی کاشت کی حوصلہ افزائی کریں اور اس کو فروغ دیں جو کہ جموں و کشمیر میں نوجوانوں کے لئے ایک ممکنہ کاروباری شخصیت ہے۔اِن باتوں کا اِظہار مشیر موصوف نے جموں کی زرعی سائنس اور ٹیکنالوجی یونیورسٹی کے مشروم کاشت اور سپون پیداوار کے تجرباتی سیکھنے کے پروگرام کے اَنڈر گریجویٹ طلاب سے بات چیت کرنے کے دوران کیا۔اُنہوں نے طلباء کو مشروم کاشت اور سپون کی پیداوار کے کاروبار کی حوصلہ اَفزائی کی ۔اُنہوں نے اس بات پر زور دیا کہ سال بھر مشروم کی مصنوعی کاشت آمدنی پیدا کرنے کا ایک قابل اعتماد ذریعہ بن سکتی ہے اور طلباء کو نہ صرف ان کی روزی روٹی کمانے میں مدد دیتی ہے بلکہ وہ روزگارکے متلاشی ہونے کے بجائے روزگار فراہم کرنے والے بھی بن سکتے ہیں۔اُنہوں نے جموں خطے میں نئی سپون پروڈکشن لیبارٹریاں کھولنے کی ضرورت پر زور دیا تاکہ سپون کی دستیابی کے حوالے سے کسانوں کی مانگ کا خیال رکھا جائے۔وائس چانسلر یونیورسٹی ڈاکٹر جے پی شرما نے یونیورسٹی میں پیش کئے جانے والے مختلف تجرباتی سیکھنے کے پروگراموں کے بارے میں مشیرموصوف کو جانکاری دی۔یونیورسٹی کے ڈائریکٹر ریسرچ اور رجسٹرار ڈاکٹر جگ پال شرما نے سکاسٹ جموں کے مشروم یونٹ کی تحقیقی سرگرمیوں کی نمائش کی۔پلانٹ پیتھالوجی ڈویژن کے سربراہ ڈاکٹر امریش وید اور ایسو سی ایٹ پروفیسر اور اِنچارج مشروم یونٹ ڈاکٹر سچھ گپتا نے معززین کو کسانوں ، طلاب اور نوجوان انٹرپرینوروں کو سکاسٹ ۔ جموں کے مشروم یونٹ کے ذریعہ فراہم کی جانے والی خدمات کے بارے میں آگاہ کیا۔
