یواین آئی
سرینگر؍؍شمالی کشمیر کے ضلع کپوارہ میں لائن آف کنٹرول (ایل او سی) کے ٹنگڈار سیکٹر میں تعینات ایک فوجی میجر نے مبینہ طور پر اپنی ہی بندوق سے اپنا کام تمام کر دیا ہے۔سرکاری ذرائع نے بتایا کہ ٹنگڈار سیکٹر میں تعینات جموں و کشمیر رائفلز سے وابستہ ایک فوجی میجر نے پیر کے روز اپنی ہی سروس رائفل سے اپنی زندگی کا خاتمہ کر دیا۔مہلوک فوجی افسر کی شناخت جموں و کشمیر رائفلز یونٹ چھ کے کمپنی کمانڈر میجر فیاض اللہ خان کے طور پر ہوئی ہے۔انہوں نے مزید کہا کہ پولیس نے اس ضمن میں ایک کیس درج کر کے تحقیقات شروع کی ہیں۔قابل ذکر ہے کہ سیکورٹی اداروں کی جانب سے یوگا اور آرٹ آف لیونگ کی سرگرمیاں متعارف کرانے کے باوجود بھی جموں و کشمیر میں تعینات سیکورٹی فورس اہلکاروں میں خودکشی کے رجحان میں کوئی کمی نہیں آ رہی ہے۔سابق مرکزی وزیر مملکت برائے دفاع سبھاش بھامرے نے گذشتہ برس ماہ فروری میں راج سبھا میں فوجی جوانوں کی طرف سے خودکشیاں کرنے کی تفصیلات فراہم کرتے ہوئے کہا کہ سال 2018 کے دوران 80 فوجی اہلکاروں نے خود کشی کی جبکہ ہوائی فوج میں 16 اہلکاروں اور نیوی میں 8 اہلکاروں نے خود کشی کی۔انہوں نے کہا کہ سال 2017 میں 75 فوجی اہلکاروں کے بارے میں شک کیا جاتا ہے کہ انہوں نے خود کشی کی ہے جبکہ سال 2016 میں 104 فوجی اہلکاروں کی موت خودکشی کرنے سے واقع ہوئی ہے۔
