یواین آئی
جالندھر؍؍ کورونا وائرس (کووڈ۔19) کے پیش نظر ملک گیر لاک ڈاون کی وجہ سے ضلع میں پھنسے ہوئے ضرورت مندوں تک مدد پہچانے کی اپنی مہم کو جاری رکھتے ہوئے پنجاب میں جالندھر ضلع انتظامیہ نے جمعہ کو گوریا میں پھنسے جموں۔کشمیر کے 20باشندوں کے ایک گروپ کو طبی سہولت اور سوکھے راشن کے پیکٹ دیئے ۔تحصیلدار فلور مسٹر تپن بھنوٹ کو کچھ گاوں والوں نے بتایا تھا کہ جموں۔کشمیر کے ضلع کپواڑہ کے تقریباََ 20باشندے بند کی وجہ سے گوریا میں پھنس گئے ہیں۔ حکام کو مطلع کیا گیا کہ ان جموں۔کشمیر کے باشندوں کے ، جن میں سے بیشتر لکڑہارے اور شال فرو خت کرنے والے ہیں، پاس کھانے کا سامان ختم ہوگیا ہے ۔ کارروائی میں مصروف تحصیلدار نے پورے معاملہ کو ڈپٹی کمشنر وریندر کمار شرما اور سب ڈویزنل مجسٹریٹ ونیت کمار کے نوٹس میں لایا جنہوں نے ان سے ان لوگوں کی ہر طرح سے مدد یقینی بنانے کے لئے کہا۔تحصیلدار کی قیادت میں ٹیم گوریا شہر گئی اور ان تمام کو آٹہ، چاول، دال، چینی او ر چائے کی پتی سمیت سوکھاراشن کے پیکٹ سونپے ۔ حکام نے کپواڑہ کے باشندوں کو خود کو رابطہ کرنے کے نمبر دیئے اور کہا کہ مستقبل میں کسی اور چیز کی ضرورت ہونے پر انہیں فون کریں۔ا س کے علاوہ ٹیم نے انہیں شیلٹر ہاوس کے بارے میں بھی بتایا جو انتظامیہ کی طرف سے لوگوں مفت کھانا، بورڈنگ اور ٹھہرنے کی سہولت دینے کے لئے بنائے گئے ہیں۔کپواڑہ کے باشندوں سمیت غلام محمد، محمد گلزار، محمد شکیل، نیاز اور دیگر لوگوں نے انسانی مدد کے لئے پنجاب حکومت اور ضلع انتظامیہ کا شکریہ ادا کیا۔ڈپٹی کمشنر نے کہاکہ ضلع انتظامیہ نے شیلٹر ہاوس میں کھانا، ٹھہرنے اور طبی سہولیات کا کافی انتظام کیا ہے ۔ انہوں نے کہاکہ ان میں سے بیشتر اشیا فروخت کرنے والے یا لکڑہارے کے طورپر کام کرتے ہیں جو روزگار کے لئے ضلع میں آئے تھے لیکن لاک ڈاون نافذ ہونے کے بعد یہاں پھنس گئے ۔انہوں نے کہاکہ انتظامیہ کی ٹیمیں ضرورت مند وں اور ضلع میں پھنسے لوگوں تک کھانا پہنچانا یقینی بنا رہی ہے ۔ مسٹر شرما نے کہا کہ وزیراعلی کیپٹن امرندر سنگھ کی قیادت والی پنجاب حکومت اس بحران کے وقت میں لوگوں کی فلاح و بہبود یقینی بنانے کے لئے پرعزم ہیں۔
