یواین آئی
چنڈی گڑھ؍؍کورونا وائرس کو ہریانہ حکومت نے آج وبا قرار دے دیا اور اس طرح ہریانہ دنیا بھر میں پھیلی بیماری کو وبا قرار دینے والی ملک کی پہلی ریاست بنی۔ہریانہ کے وزیر صحت انل وج نے یہاں جاری بیان میں کہا کہ کورونا وائرس ان دنوں پوری دنیا کے لئے تشویش کا موضوع بنا ہوا ہے ۔ ہر ملک اپنی اپنی سطح پر اس سے نمٹنے کے لئے اقدامات بھی کر رہے ہیں۔ ایسے ہی ہندوستان بھی کورونا وائرس سے نمٹنے کے لئے کئی طرح کی احتیاطی تدابیر برت رہا ہے ۔ اسی کی وجہ سے ہریانہ میں کورونا وائرس کو وبا قرار دے دیا گیا ہے ۔مسٹر وج نے کہا کہ اس مہلک وائرس کو وبا قرار دینے کے بعد دی گئی ہدایات کو لاگو کرنے کے لئے محکمہ صحت کو قانونی طور پر اختیار مل جاتے ہیں۔ پھر چاہے وہ سرکاری اسپتال یا پرائیوٹ اسپتال یا کوئی شخص ہی کیوں نہ ہو۔ انہوں نے واضح کیا کہ اب حکومت کو یہ حق مل گیا ہے کہ حکومت کسی کو بھی 14 دن کے لئے اسپتال کی نگرانی میں رکھ سکتی ہے ۔ پھر اس کے لئے چاہے حکومت کو اس شخص پر دباؤ ہی کیوں نہ بنانا پڑے ۔ وزیر صحت نے کہا کہ کہ کورونا وائرس کے سبب طبی عملے کی چھٹیاں پہلے ہی منسوخ کر دی گئی تھیں۔واضح رہے کہ عالمی ادارہ صحت (ڈبلیو ایچ او) نے 11 ‘نوول کووڈ 19 کورونا وائرس’ کو عالمی وبا قرار دیتے ہوئے واضح کیا کہ انفیکشن کے تشویشناک حد تک پھیلنے پر دنیا کو فکر ہے مگر عالمی وبا کی اصطلاح کا مطلب ‘وائرس’ سے ہار ماننا نہیں بلکہ اس کی درجہ بندی اور اس سے حفاظت کے لیے اقدامات کرنا ہے ۔ اس مہلک وائرس کی زد میں آکر دنیا بھر میں 4623لوگوں کی موت ہوچکی ہے اور 125841لوگ اس ورائرس سے زندگی اور موت کی جنگ لڑرہے ہیں۔
