دوبئی، (یو این آئی) آئی سی سی ٹی۔20خواتین عالمی کپ میں جارحانہ کارکردگی کامظاہرہ کررہی ہندستان کی 16 سالہ نوجوان سلامی بلے باز شیفالی ورما آئی سی سی کی تازہ ٹی۔20رینکنگ میں بدھ کو سرفہرست مقام پر پہنچ گئی۔شیفالی نے آسٹریلیا میں جاری عالمی کپ میں شاندار کارکردگی کا مظاہرہ کیا جس کا فائدہ اسے بلے بازوں کی رینکنگ میں ملا۔ شیفالی نے 19مقامات کی لمبی چھلانگ لگاکر 761ریٹنگ پوائنٹس کے ساتھ اس فہرست میں پہلا مقام حاصل کرلیا جبکہ نیوزی لیند کی سوزی بیٹس 750ریٹنگ پوائنٹس کے ساتھ دوسرے مقام پر ہے ۔ہندستان کی اسمرتی مندھانا دو مقامات گرکر 701پوائنٹس کے ساتھ ساتویں مقام پر آگئی ہے جبکہ جمیما راڈرگس بھی دو مقام پھسل کر 658پوائنٹس کے ساتھ نویں مقام پر پہنچ گئی ہے ۔ ہندستانی ٹی۔20ٹیم کی کپتان ہرمنپریت کور 617پوائنٹس کے ساتھ 12ویں مقام پر قابض ہے ۔تیسرے مقام پر آسٹریلیا کی بیتھ مونی ہے جس کے 746ریٹنگ پوائنٹس ہیں۔ نیوزی لینڈ کی کپتان سوفی ڈیوائن 742پوائنٹس کے ساتھ چوتھے اور آسٹریلیا کی میگ لیننگ 708پوائنٹس کے ساتھ پانچو یں مقام پر ہے ۔گیندبازوں کی فہرست میں ہندستان کی پونم یادو چار مقامات کی بہتری کرتے ہوئے 704پوائنٹس کے ساتھ آٹھویں مقام پر پہنچ گئی ہے ۔ دپتی شرما 723پوائنٹس کے ساتھ پانچویں مقام پر اور رادھا یادو ساتویں مقام پر ہے ۔ اس فہرست میں انگلینڈ کی سوفی ایکلسٹون 779پوائنٹس کے ساتھ پہلے اور آسٹریلیا کی میگن شٹ دوسرے مقام پر ہے ۔یو این آئی۔
