’تقریبات پرامن ماحول میں منعقد کی جائیں گی‘

یوم جمہوریہ پر جنگجوئوں کی کسی بھی کوشش کو کامیاب نہیں ہونے دیں گے: وجے کمار
یواین آئی

سرینگر؍؍کشمیر زون پولیس کے انسپکٹر جنرل وجے کمار نے کہا کہ جموں وکشمیر پولیس اور سیکورٹی فورسز یوم جمہوریہ کے موقع پر کسی بھی صورتحال سے نمٹنے کے لئے تیار ہیں اور کسی بھی ناخوشگوار واقعہ کو رونما نہیں ہونے دیا جائے گا۔انہوں نے کہا کہ یوم جمہوریہ کی تقریبات کے احسن انعقاد کو یقینی بنانے کے لئے شبانہ گشت اور چیکنگ کا عمل تیز کرنے کے علاوہ نئی ٹیکنالوجی کا بھی بھرپور استعمال کیا جارہا ہے۔آئی جی کشمیر وجے کمار نے جمعہ کے روز یہاں شیر کشمیر کرکٹ اسٹیڈیم میں منعقدہ یوم جمہوریہ کی فل ڈریس ریہرسل تقریب کے حاشیہ پر نامہ نگاروں کو بتایا: ‘کشمیر بھر میں پولیس اور سیکورٹی فورسز کی طرف سے فل پروف انتظامات کئے گئے ہیں۔ یہ تقریبات پرامن ماحول میں منعقد کی جائیں گی’۔انہوں نے کہا: ‘پچھلے کچھ عرصے سے آپریشنوں میں تیزی لائی گئی ہے۔ بہت سارے اعلیٰ جنگجو کمانڈروں کو گرفتار کیا گیا ہے۔ بہت سارے کمانڈروں کو ہلاک کیا گیا ہے۔ ہم نے علاقوں کو حصوں میں منقسم کیا ہے۔ ہم کوئی بھی ناخوشگوار واقعہ رونما نہیں ہونے دیں گے’۔ وجے کمار نے یوم جمہوریہ کی تقریبات کے احسن انعقاد کے لئے نئی ٹیکنالوجی کے استعمال پر کہا: ’15 اگست یا 26 جنوری کو ہم سیکورٹی انتظامات بڑھاتے ہیں۔ رات کو گشت بڑھائی جاتی ہے اور چیکنگ کا عمل تیز ہوجاتا ہے۔ اس کے لئے ہم نئی ٹیکنالوجی کا استعمال کرتے ہیں۔ ہم کوئی ناخوشگوار واقعہ رونما نہیں ہونے دیں گے’۔ انہوں نے کہا: ‘جنگجو اگر حملے کرنے کی منصوبہ بندی کرتے ہیں تو ہمارے پاس بھی ایسے حملوں کو کونٹر کرنے کی منصوبہ بندی ہوتی ہے۔ ہم کسی بھی صورتحال سے نمٹنے کے لئے تیار ہیں’۔ آئی جی پی نے کشمیری عوام سے یوم جمہوریہ کی تقریبات میں شرکت کرنے کی اپیل کرتے ہوئے کہا: ‘ہم عوام سے اپیل کرتے ہیں کہ وہ بھی یوم جمہوریہ کی تقریبات میں شرکت کریں’۔ دریں اثنا جموں کشمیر حکومت نے تین دہائیوں سے جاری روایت کو برقرار و بحال رکھتے ہوئے امسال بھی یوم جمہوریہ کی تقریبات میں سرکاری ملازمین کی شرکت کو لازمی و ضروری قرار دیا ہے۔ حکومت نے اس سلسلے میں باقاعدہ حکم نامے جاری کئے ہیں جن میں حکم کی عدولی کرنے والے ملازمین کے خلاف تادیبی کارروائی عمل میں لانے کا انتباہ کیا گیا ہے۔ادھر مبصرین کا متذکرہ حکم ناموں کے بارے میں کہنا ہے کہ جموں کشمیر بالخصوص وادی کشمیر میں یوم جمہوریہ یا یوم آزادی کی تقریبات میں عام لوگوں کی طرف سے شرکت کرنے سے بائیکاٹ کرنا حکومت کی طرف سے اس نوعیت کے حکم نامے جاری ہونے کی بنیادی اور اصلی وجہ ہے۔