جے پور؍؍اداکارہ پائل روہتگی کو راجستھان پولیس نے مجاہدآزادی موتی لال نہرو کے حوالے سے سوشل میڈیا پر متنازعہ ویڈیو اور پوسٹ ڈالنے کے معاملے میں آج گجرات کے شہر احمدآباد سے حراست میں لے لیا ۔ پولیس کے مطابق اس معاملے بوندی پولیس نے پائل کو احمدآباد سے حراست میں لے کر بوندی لایا جارہا ہے جہاں پولیس اس معاملے میں اس سے پوچھ گچھ کرے گی۔ قابل ذکر ہے کہ پائل نے مسٹر موتی لال نہرو پر ایک ویڈیو بنایا تھا۔ یہ ویڈیو سوشل میڈیا پر آنے کے بعد ضلع بوندی میں ایک کانگریس کے کارکن نے اس پر اعتراض ظاہر کرتے ہوئے پائل کے خلاف گذشتہ 10اکتوبرکو صدر تھانے میں آئی ٹی ایکٹ کے تحت مقدمہ درج کروایا تھا۔ پائل نے اپنے ٹویٹر اکاؤنٹ پر کہا کہ راجستھان پولیس نے موتی لال نہرو پر ویڈیو بنانے کے معاملے میں اسے گرفتار کیا ہے ۔ یہ ویڈیو میں نے گوگل سے حاصل معلومات کی بنیاد پر بنائی تھی۔ اظہار خیال کی(شخصی) آزادی کا مذاق بن گیا ہے ۔ پائل نے ٹویٹ میں وزارت داخلہ اور وزیر اعظم کے دفتر کو بھی ٹیگ کیا ہے ۔پائل کے خلاف معاملہ درج ہونے کے بعد اس کی جانب سے بوندی کی عدالت میں عبوری ضمانت کی عرضی داخل کی گئی تھی۔ اس پر جمعہ کے روز سماعت ٹل گئی اور اب پیر کے روز شنوائی ہوگی۔قابل ذکر ہے کہ گذشتہ 21 ستمبر کو مسٹر نہرو کے سلسلے میں سوشل میڈیا پر ویڈیو اور پوسٹ ڈالی گئی تھی۔
