یواین آئی
نئی دہلی؍؍سپریم کورٹ الیکشن کمشنروں کو آئینی تحفظ دینے سے متعلق درخواست پر چار ہفتے بعد سماعت کرے گا۔درخواست گزار بی جے پی لیڈر اشونی اپادھیائے نے منگل کو چیف جسٹس ایس اے بوبڈے کی صدارت والی بنچ کے سامنے معاملہ کا ذکر کیا اور فوری سماعت کی درخواست کی۔ اپادھیائے نے دلیل دی کہ یہ مفاد عامہ کی عرضی آخری بار ستمبر 2018 میں درج ہوئی تھی، اس کے بعد اس درخواست کو درج نہیں کیا گیا۔اس پر جسٹس بوبڈے نے کہا کہ درخواست کی سماعت چار ہفتے بعد ہوگی۔اس کا مطلب ہے کہ عرضی جنوری 2020 کے پہلے ہفتے میں درج ہوگی۔مسٹر اپادھیائے کی عرضی میں الیکشن کمشنروں کو آئینی تحفظ فراہم کرنے اور ہٹائے جانے کا عمل چیف الیکشن کمشنر (سی ای سی) کی مانند کرنے کا مطالبہ کیا گیا ہے ۔عرضی میں الیکشن کمیشن کو لوک سبھا اور راجیہ سبھا کی طرح ایک آزاد سکرٹریٹ فراہم کرنے اور بجٹ میں اس کے لئے الگ سے خاص التزام کرنے کا مرکزی حکومت کو ہدایات دینے کا مطالبہ کیا گیا ہے ۔ عرضی گذار نے الیکشن کمشنروں کی تقرریوں کے لئے کلجیم نظام کو یقینی بنانے کا بھی مطالبہ کیا ہے جس میں وزیر اعظم، ہندوستان کے چیف جسٹس اور لوک سبھا میں اپوزیشن کا لیڈر شامل ہو۔
