مرادآباد (یو این آئی ) کشتی کھیل کا آنکھوں دیکھا حال سنانے والے ملک کے انتہائی مقبول کمنٹیٹر پنکج سکسینہ کا یہاں طویل بیماری کے بعد انتقال ہو گیا ہے ۔ ان کی جمعہ کو آخری رسومات ادا کردی گئیں ۔ وہ 75 سال کے تھے ۔ ان کے خاندان میں ایک بیٹا اور ایک بیٹی ہے ۔بھرائی آواز کے حامل کشتی کمنٹیٹر پنکج سکسینہ کا جمعرات کو انتقال ہوا۔ جمعہ کو مرادآباد کے لال باغ شمشان گھاٹ پر ان کی آخری رسومات ادا کی گئیں ۔ اس موقع پر بڑی تعداد میں کھیل شائقین اور جانے مانے کھلاڑی موجود تھے ۔ مرادآباد کے ڈپٹي گنج رہائشی پنکج سکسینہ بین الاقوامی کوچ کا رتبہ بھی حاصل کر چکے تھے ۔ وہ پاور کارپوریشن انجنیئر عہدے سے ریٹائرڈ ہوئے تھے ۔ سکسینہ بھارتیہ جنتا پارٹی کے کھیل سیل کے عہدیدار رہے تھے ۔ ڈبل اولمپک میڈلسٹ سشیل کمار اور ارجن ایوارڈي کرپاشکر بشنوئی نے ان کے انتقال پر افسوس کا اظہار کیا ہے ۔
