سری نگر میں کافی گہماگہمی دیکھنے کو ملی
ڈی آرپی آر نے دیہی ترقی سے متعلق کلچرل پروگرام کا اِنعقاد کیا
سری نگر//بیک ٹو ولیج پروگرام ۔2 کے پانچویں دِن آج سری نگر ضلع کے کئی پنچایتی حلقوں میں کافی سرگرمیاں دیکھنے کو ملی ۔ سویۂ ٹینگ ، تھید ۔ بی، گنڈ تل ، سعیدپورہ ، کھمبر ، فقیر گجری اور دیگر پنچایتی حلقوں میں کئی عوامی رابطہ پروگرام منعقد کئے گئے۔ اس دوران دورہ کرنے والے افسروں نے برسر موقعہ لوگوں کے معامات کا جائزہ لیا اور لوگوں کی بہبود کے لئے ہاتھ میں لئے گئے ترقیاتی پروجیکٹوں کے حوالے سے ان کا فیڈ بیک حاصل کیا۔ دورہ کرنے والے افسر ریاض احمد گاسی نے ہارون حلقے میں 35کروڑ روپے کی لاگت سے عملائی جارہی واٹر سپلائی سکیم کا افتتاح کیا۔ اس موقعہ پر لوگوں نے انفرادی اور اجتماعی نوعیت کے معاملات اجاگر کئے۔ گنڈہ تل ، سویۂ ٹینگ ، تھید ۔بی ، سعدہ پورہ اور کئی دیگر حلقوں میں بھی لوگوں نے صحت ، بجلی ، پانی ، سڑک رابطوں ، تعلیم اور دیگر شعبوں کے مسائل کو اُجاگر کیا۔ سعیدہ پورہ میں خطاب کرتے ہوئے نامزد افسر عبدالاحد بٹ نے لوگوں کو ایم جی نریگا ، ایوشمان بھارت ،بیٹی بچائو بیٹی پڑھائو، کھیلو انڈیا ، ایس بی ایم اور دیگر سکیموں کو اُجاگر کیا۔ دورہ کرنے والے افسروں کے ہمراہ دیگر محکموں کے افسران بھی تھے اور موقعہ پر ہی لوگوں کے مسائل کے بارے میں جانکاری حاصل کی اور بتایا گیا کہ مسائل پر مبنی ایک مفصل رِپورٹ ڈی سی کو بھیجی جائے گی۔ محکمہ اطلاعات و رابطہ عامہ نے بیک ٹو ولیج کے تحت دیہی ترقی سے متعلق ایک کلچرل پروگرام کا بھی انعقاد کیا جس دوران وادی کے معروف فنکاروں نے بی ٹو وی 2پروگرام کے اغراض و مقاصد کو اُجاگر کیا۔ دورہ کرنے والے افسروں میں چیف اکائونٹس آفیسر فائنانس آرزو کھور ، اے ڈی ڈی آئی پی آر عبدالاحد بٹ اور کئی دیگر افسران بھی تھے۔
