یواین آئی
جے پور//مہاراشٹر میں سیاسی بحران برقرار ہے اور خریدو فروخت سے بچانے کے لئے جے پور لائے گئے کاگر نگریس کے 40 ممبر اسمبلی پارٹی اعلی کمان کے پیغام کا انتظار کر رہے ہیں۔مہاراشٹر میں حکومت بنانے کے لئے کانگریس کا موقف اب بھی واضح نہ ہونے سے گزشتہ تین چار دن سے مہاراشٹر کانگریس کے یہ ممبران اسمبلی ایک پرائیویٹ ریزورٹ میں ٹھہرے ہوئے ہیں جہاں انہیں اعلی کمان کے حکم کا انتظار ہے ۔ موصولہ اطلاعات کے مطابق پارٹی کے راجستھان انچارج اور سینئر لیڈر اویناش پانڈے دہلی میں اعلی کمان کے ساتھ بات چیت کے بعد جے پور آ رہے ہیں اور جے پور پہنچنے کے بعد براہ راست ریزورٹ جاکر ممبران اسمبلی کے ساتھ ملاقات کریں گے اور اعلی کمان کا پیغام ممبران اسمبلی کو دیں گے ۔ کانگریس کے یہ ممبران اسمبلی پیر سے ریزورٹ کے باہر گھومنے کے لئے بھی نہیں نکل رہے ہیں اور آج بھی ریزورٹ کے اندر بیٹھے سیاسی سرگرمیوں پر نظر رکھے ہوئے ہیں اور آپس میں بات چیت کر رہے ہیں ۔ ان ممبران اسمبلی سے کانگریس کے کئی سینئر لیڈروں نے مل کر تبادلہ خیال کیا ہے ۔ راجستھان کے وزیر اعلی اشوک گہلوت بھی نظر بنائے ہوئے ہیں اور ریاست کے ہیلتھ کے وزیر ڈاکٹر رگھو شرما برابر ان کے رابطے میں ہیں۔ کانگریس ھارس ٹریڈنگ سے بچانے کے لئے اپنے اراکین اسمبلی کو جے پور لائی تھی، لیکن بھارتیہ جنتا پارٹی (بی جے پی) کی جانب سے حکومت نہیں بنانے کی بات سامنے آنے کے بعد حالات بدلتے نظر آ ر ہے ہیں۔ کانگریس کا حکومت میں شامل ہونے اور نہ ہونے کو لے کر پارٹی کے اندر گومگو کی صورتحال بنی ہوئی ہے اور یہاں ریزورٹ میں ٹھہرے کانگریس ممبران اسمبلی کو اس سلسلہ میں اعلی کمان کے اشارے کا انتظار کررہے ہیں۔ یہ ممبر اسمبلی پیر کو دن بھر ریزورٹ میں ہی رہے اور رات کو وزیر اعلی کی رہائش گاہ پر سابق صدر پرتیبھا پاٹل کے اعزاز میں دی گئی ضیافت میں شامل ہوئے اور اس کے بعد واپس ریزورٹ چلے گئے ۔ اس دوران ممبران اسمبلی سے چھتیس گڑھ کے وزیر اعلی بھوپیش بگھیل سمیت کانگریس کے دیگر کئی لیڈر وں نے ملاقات کی۔
