بغداد،10نومبر(یواین آئی) سیکورٹی فورسز کی فائرنگ سے عراق میں حکومت کے خلاف احتجاج کرنے والے 7 مظاہرین ہلاک اور متعدد زخمی ہوگئے ۔عالمی خبررساں ایجنسی کے مطابق عراق کے بڑے شہروں بصرہ اور بغداد میں فوج اور پولیس نے حکومت کے خلاف احتجاج کرنے والے مظاہرین پر فائرنگ کی ۔ دارالحکومت بغداد میں دریائے دجلہ پر قائم پل اور اس کے نزدیک تحریر اسکوائر میں سیکڑوں افراد احتجاج کررہے تھے ۔سیکورٹی اہلکاروں نے انھیں وہاں سے ہٹانے کے لیے براہ راست فائرنگ اور آنسو گیس کی شیلنگ کی جبکہ دستی بموں کا بھی استعمال کیا۔ اس واقعہ میں 7 افراد ہلاک اور درجنوں زخمی ہوگئے ۔ اسی طرح سیکورٹی فورسز نے بصرہ میں بھی مظاہرین کے خلاف سخت کارروائی کی۔عراق بھر میں بے روزگاری اور کرپشن کے خلاف مظاہرے ہورہے ہیں جن میں ہزاروں افراد شریک ہیں۔ عراقی وزیراعظم عادل عبدالمہدی نے احتجاج ختم کرنے کے لیے زور دیتے ہوئے نئی انتخابی اصلاحات کا اعلان بھی کیا ہے ۔چند روز قبل مظاہرین نے ایرانی قونصل خانے پر دھاوا بول کر وہاں سے پرچم اتار کر پھینک دیاتھا۔
