جموں وکشمیر میںہوٹلوں میں آگ کی ممکنہ وارِداتوں پر قابو پانے کیلئے ہمہ جہت لائحہ عمل ترتیب
لازوال ڈیسک
جموں؍؍لیفٹیننٹ گورنر جی سی مرمو کی ہدایات پر حکومت نے جموںوکشمیر کے سبھی ہوٹلوں میں ’’ فائر سیفٹی آڈٹ‘‘ کرانے کے احکامات دئیے ہیں۔اِس سلسلے میں چیف سیکرٹری بی وی آر سبھرامنیم نے آج پرنسپل سیکرٹری داخلہ، ڈائریکٹر جنرل فائر اینڈ ایمرجنسی سروسز ، سیکرٹری ڈیزاسٹر منیجمنٹ ، ناظم سیاحت جموں او ردیگر افسران کے ساتھ میٹنگ کی ۔ صوبائی کمشنر کشمیر اور ناظم سیاحت کشمیر نے ویڈیو کانفرنسنگ کے ذریعے میٹنگ میں شرکت کی۔ موسم سرما کی شروعات کے ساتھ ہی گھروں او رہوٹلوں کے علاوہ دیگر اداروں میں گرمی دینے والے آلات کا استعمال بڑھ جاتا ہے ۔ ان آلات کے استعمال میں کوئی بھی کوتاہی خطرناک ثابت ہوسکتی ہے اور کئی بار آگ لگنے کی وارِدات رونما ہوتی ہے۔آگ کی وارِ داتوں پر قابو پانے کے لئے ضروری اقدامات کرنا لازمی بن جاتا ہے ۔ اسی سلسلے میں حکومت نے ہمہ جہت لائحہ عمل ترتیب دیا ہے۔اسی لائحہ عمل کے ایک حصے کے طور ایک پانچ رُکنی ٹیم جموں وکشمیر کے تمام ہوٹلوں کا ’’ فائر سیفٹی آڈِٹ ‘‘ کرے گی ۔ جموں اور کشمیر کے صوبائی کمشنران ان ٹیموں کو تشکیل دیں گے۔ان ٹیموں میں فائر اینڈ ایمرجنسی سروسز ، مال ، سیاحت ، بجلی محکموں اور ٹوراِزم ڈیولپمنٹ اتھارٹیز کے اَفسران شامل ہوں گے ۔ یہ ٹیمیں 9؍ نومبر 2019ء تک اپنی رِپورٹیں متعلقہ صوبائی کمشنروں کو پیش کریں گی۔فائر سیفٹی آڈِٹ کے تحت ہوٹلوں کا معائینہ کیا جائے گا اور اِن میں استعمال ہونے والی مختلف اشیاء اور دستیاب سہولیات کا جائزہ لیا جائے گا۔اس کے علاوہ ہوٹل عملے کو ضروری تربیت اور جانکاری دی جائے گی تاکہ ایمرجنسی حالات سے مؤثر طور نمٹا جاسکے ۔جن ہوٹلوں میں کوئی بھی خامی یا کمی پائی جائے گی اُنہیں یہ خامی دور کرنے کے لئے 30؍ نومبر 2019ء تک کا وقت دیا جائے گا۔ہوٹلوں کے عملے کے لئے فائر اینڈ ایمرجنسی سروسز دسمبر 2019 ء کے پہلے ہفتے میں تربیتی پروگرام کا اِنعقاد کرے گا۔اس کے علاوہ فائر اینڈ ایمرجنسی سروسز کے DG مختلف سیاحتی مقامات بشمول گلمرگ ، پہلگام ، سونہ مرگ ، پتنی ٹاپ ، بھدر واہ اور ریاسی میں قائم فائر سٹیشنوں کو مزید مستحکم کرنے کے لئے مطلوبہ اشیاء اور ضروریات کی فہرست تیار کریں گے۔
