شوپیاں علاقے میں جنگجوانہ حملے میں مارے گئے تھے
یواین آئی
بھرت پور؍؍ جموں و کشمیر کے شوپیاں علاقے میں جنگجوانہ حملے میں مارے گئے ٹرک کنڈیکٹر زاہد خان کی لاش ان کے آبائی گاؤں بھرت پور کے پہاڑی تھانہ علاقہ کے پاپڑا لائی گئی ، جہاں اہل خانہ نے پندرہ لاکھ روپے معاوضہ اور سرکاری نوکری کا مطالبہ کرتے ہوئے لاش لینے سے انکار کر دیا ۔زاہد کی لاش جمعہ دیر رات پاپڑا گاؤں پہنچی ۔ اہل خانہ نے اپنا مطالبہ کرتے ہوئے لاش لینے سے انکار کرنے کے بعد لاش کو پہاڑی کے سرکاری اسپتال کے مردہ خانہ میں رکھا گیا ہے ۔ موصول اطلاع کے مطابق جنگجوانہ حملے میں مارے گئے الور ضلع کے کشن گڑھ باس علاقے کے کھوھاباس کے رہنے والے ٹرک ڈرائیور الیاس خان کے لاش کو بھی اہل خانہ نے لینے سے انکار کرنے کے بعد لاش کو کشن گڑھ باس کے اسپتال کے مردہ خانہ میں رکھا گیاہے ۔ دونوں جگہ پولیس اور انتظامیہ مہلوکین کے اہل خانہ کو سمجھانے کی کوشش کر رہی ہے ۔ الیاس خان اور زاہد خان کی کشمیر کے شوپیاں میں جنگجوؤں نے جمعرات کی شب کو گولی مار کر قتل کر دیا تھا ۔ دونوں ٹرک سے کشمیر میں آرمی کے لئے دودھ لے کر گئے اور واپسی میں سیب لے کر واپس لوٹ رہے تھے ۔ جنگجوؤں نے ان کے ٹرک کو بھی جلا دیا۔
