یواین آئی
نئی دہلی؍؍کانگریس کے سینئر رہنما اور ممبر پارلیمان منیش تیواری نے وزیر اعظم نریندر مودی شہید بھگت سنگھ’ راج گرو اور سکھ دیو کو بھارت رتن دینے کا مطالبہ کیا ہے ۔مسٹر تیواری نے وزیر اعظم کو خط لکھ کر اس طرف ان کی توجہ مبذول کرائی ہے ۔ انہوں نے اگلے سال 26جنوری کو تینوں شہیدوں کو بھارت رتن سے نوازنے اور رسمی طور پر ‘شہید اعظم’ اعلان کرنے کی درخواست کی ہے ۔ انہوں نے کہا کہ شہید بھگت سنگھ’ راج گرو اور سکھ دیو نے برطانوی حکومت کے خلاف اعلی ترین قربانی دے کر محبان وطن کی ایک پوری نسل کو متحرک کیا۔مسٹر تیواری نے چنڈی گڑھ ہوائی اڈے کا نام شہید اعظم شہید بھگت سنگھ کرنے کی بھی درخواست کی۔ انہوں نے کہا کہ یہ فیصلہ ملک کے 124 کروڑ لوگوں کے دلوں اور جذبات کے مطابق ہوگا۔خیال رہے کہ انگریزوں نے بھگت سنگھ’ راج گرو اور سکھ دیو کو 23مارچ 1931کو پھانسی دے دی تھی۔
