ان کی بہادری اور قربانی ہر انسان کے لئے باعث تحریک ہے:راجناتھ سنگھ
یواین آئی
نئی دہلیوزیر دفاع راج ناتھ سنگھ نے آج یہاں کرگل وجے دوس کی 20ویں سالگرہ کے موقع پر قومی جنگی یادگار پر شہیدوں کو خراج عقیدت پیش کیا۔اس موقع پر وزیر دفاع نے ”ویزیٹرس بک“میں اپنے پیغام میں تحریر کیا کہ”کرگل کے جنگ کے بہا در فوجیوں کو خراج عقیدت، جنہوں نے ہندوستان کی عزت ، وقار اور فخر کے لئے اپنی جانیں نچھاور کیں۔ ان کی بہادری اور قربانی ہر انسان کے لئے باعث تحریک ہے ۔ کرگل وجے دوس کی 20ویں سالگرہ پر ہم یہ عہد کرتے ہیں کہ شکر گزار قوم ملک کے وقار کے لئے سپاہیوں کے ذریعے دی گئی عظیم قربانی کو کبھی نہیں بھلائیں گے“۔دفاع کے وزیر مملکت سری پد یسو نائک ، فوج کے نائب سربراہ لیفٹیننٹ جنرل دیوراج انبو ، بحریہ کے نائب سربراہ وائس ایڈمیرل جی اشوک کمار ، اور فضائیہ کے نائب سربراہ ایئر مارشل راکیش کمار سنگھ بدھوڑی نے بھی آپریشن وجے کے ہیروز کی جرا مندی ، بہادری اور قربانی کے لئے سلام پیش کرنے کی خاطر قومی جنگی یادگار پر گلدائرے نذر کئے ۔بھارت ’پاک کرگل جنگ 1999میں مئی سے جولائی تک ، مغرب میں زوجیلا سے مشرق میں ترنوک تک کنٹرول لائن کے قریب دشوار ترین علاقے میں لڑی گئی۔ اس لڑائی کا آغاز پاکستان نے اپنے فوجیوں کے دراندازی کے ذریعے اونچی پہاڑیوں پر خاکی چوکیوں پر قبضہ کرنے کے ساتھ کیا تھا، جس سے ملک کی علاقائی سالمیت کی خلاف ورزی سمیت قومی شاہراہ کو بھی خطرہ پیدا ہوگیا تھا۔ ہندوستانی فوج کے بہادر جوانوں نے انتہائی ثابت قدمی اور تحمل کا مظاہرہ کرتے ہوئے 12000 فٹ سے زیادہ اونچائی پر دراس ، ککسر ، بٹالک اور ترتوک سیکٹروں میں شدید جنگ لڑی اور پاکستانی در اندازوں کو مار بھگایا ۔ اس لڑائی میں ہندوستانی فضائیہ نے بھی فوجی کارروائی میں زبردست تعاون کیا۔
