شاہراہ پر ہزاروں کی تعداد میں گاڑیاں درماندہ
یواین آئی
سرینگروادی کشمیر کو ملک و بیرون دنیا کے ساتھ جوڑنے والی سری نگر۔ جموں قومی شاہراہ پر ضلع رام بن میں چٹانیں اور مٹی کے تودے کھسک آنے سے ہزاروں کی تعداد میں گاڑیاں درماندہ ہوئی ہیں۔ایک سرکاری عہدیدار نے بتایا کہ شاہراہ پر بدھ کے روز ٹریفک سری نگر سے جموں حسب معمول چل رہا تھا کہ ضلع رام بن کے آئرن اسٹینڈ ڈگڈال پر گذشتہ شب چٹانیں اور مٹی کے تودے کھسک آئے جس کے نتیجے میں ہزاروں گاڑیاں درماندہ ہوئیں اورجمعرات کی صبح سے ٹریفک کی نقل وحمل معطل رہی۔انہوں نے بتایا کہ شاہراہ پر کم سے کم 15 سو بڑی گاڑیاں جبکہ کم سے کم 3 سو چھوٹی گاڑیاں درماندہ ہیں۔عہدیدار نے کہا کہ شاہراہ سے ملبہ ہٹانے میں پورا دن لگ سکتا ہے اور اس کے بعد ہی شاہراہ پر ٹریفک بحال ہوسکتا ہے۔تاہم شاہراہ کو بحال کرنے کے لئے افرادی قوت اور مشینری کو کام پر لگایا گیا ہے۔
