’گورنرز کو یہ نہیں بھولنا چاہیے کہ وہ منتخب حکام نہیں ہیں‘

گورنروں، ریاستی حکومتوں کو خود کا جائزہ لینے کی ضرورت ہے: سپریم کورٹ
یواین آئی

نئی دہلی؍؍سپریم کورٹ نے پیر کو کئی گورنروں اور ریاستی حکومتوں کے درمیان مسلسل ’تصادم‘پر تشویش کا اظہار کرتے ہوئے کہا کہ دونوں طرف سے خود شناسی کی ضرورت ہے۔چیف جسٹس ڈی وائی چندرچوڑ اور جسٹس جے بی پارڈی والا اور منوج مشرا کی بنچ نے سات بلوں کے زیر التوا ہونے کے خلاف پنجاب حکومت کی عرضی پر سماعت کرتے ہوئے دونوں طرف سے خود شناسی کی ضرورت پر زور دیا۔بنچ نے سالیسٹر جنرل تشار مہتا سے کہا کہ وہ اس معاملے میں گورنر کی طرف سے کی گئی کارروائی کی تفصیلات فراہم کریں۔عدالت عظمیٰ نے سخت پیغام دیتے ہوئے کہا کہ گورنرز کو یہ نہیں بھولنا چاہیے کہ وہ منتخب حکام نہیں ہیں۔ عدالت نے ریاستی حکومتوں کی جانب سے عدالت عظمیٰ سے رجوع کرنے پر بھی برہمی کا اظہار کیا کہ آئینی ادارہ زیر التوا مقدمات کو نمٹانے میں ناکام رہا۔بنچ نے کہاکہ ’’پارٹیوں کو بجٹ اجلاس بلانے کے لیے عدالت عظمیٰ سے رجوع کرنے کی ضرورت کیوں ہے… یہ وہ معاملات ہیں جن کا فیصلہ گورنر اور چیف منسٹر نے کرنا ہے۔‘‘سپریم کورٹ نے کہا کہ گورنرز کو اس حقیقت سے لاعلم نہیں رہنا چاہئے کہ وہ منتخب حکام نہیں ہیں۔سینئر ایڈوکیٹ اے ایم سنگھوی نے، پنجاب حکومت کی طرف سے پیش ہوتے ہوئے کہا کہ اسپیکر نے اسمبلی کا دوبارہ اجلاس بلایا ہے اور اسمبلی نے سات بلوں کو پاس کیا ہے اور گورنر یہ کہہ کر دستخط نہیں کر رہے ہیں کہ آپ التوا پر اسمبلی کا دوبارہ اجلاس نہیں کر سکتے۔مسٹر سنگھوی نے کہا کہ اس معاملے پر عدالت کو غور کرنے کی ضرورت ہے کیونکہ گورنر پوری اسمبلی کے پاس سات بلوں کو زیر التواء رکھے ہوئے ہیں۔تاہم، عدالت نے مسٹر سنگھوی سے پوچھاکہ "آپ کو یہ معلومات کہاں سے ملی کہ وہ رضامندی نہیں دے رہے ہیں کیونکہ اسے روک دیا گیا ہے؟”اس پر مسٹر سنگھوی نے کہا کہ جون میں چار بل بھیجے گئے تھے اور گورنر نے سیشن بلانے پر اعتراض کرتے ہوئے وزیر اعلیٰ کو خط بھیجا تھا۔ وزیر اعلیٰ نے جواب دیا لیکن گورنر نے وہی اعتراض اٹھایا۔سالیسٹر جنرل تشار مہتا نے گورنر کی نمائندگی کرتے ہوئے کہا کہ گورنر نے اس معاملے میں کچھ کارروائی کی ہے۔انہوں نے کہا کہ وہ جمعہ کو تفصیلات فراہم کریں گے۔ انہوں نے ریاستی مقننہ کے ایوان کو آئینی اختیارات کا غلط استعمال کرنے پر بھی تشویش کا اظہار کیا۔جیسے ہی مسٹر سنگھوی نے تلنگانہ کیس کا تذکرہ کیا، بنچ نے کہا کہ یہ دوسری ریاستوں میں بھی ہوا ہے اور پوچھاکہ ” فریقین کو سپریم کورٹ میں کیوں آنا چاہئے؟ اس کو روکنا ہوگا۔”