کوششوں سے ہی بہار کا تعلیمی نظام بدل سکتا ہے

رنکو کماری

ان دنوں بہار کے سرکاری اسکولوں میں نئے نئے تجربات کیے جا رہے ہیں۔ یہ تجربات زیادہ سے زیادہ بچوں کو پرائمری اور سیکنڈری تعلیم سے منسلک کرنے کے لیے کیے جا رہے ہیں۔ ریاست کا محکمہ تعلیم معیاری تعلیم کو فروغ دینے، اسکول چھوڑنے والے بچوں کو اسکول کیمپس میں لانے اور بچوں کو مکمل گھنٹی تک اسکول میں رہنے کے ہدف کو پورا کرنے کے لیے سنجیدہ نظر آرہا ہے۔ ریاستی حکومت کی توجہ بھی تعلیمی نظام کو بہتر بنانے پر مرکوز ہے۔ لیکن کچھ بنیادی وجوہات کی بنا پر حکومتی کوششوں کو ابھی تک متوقع کامیابی نہیں مل سکی ہے۔ اگرچہ بہار میں سرکاری اسکولوں کے بنیادی ڈھانچے میں پچھلی دہائیوں کے مقابلے میں کافی بہتری آئی ہے، لیکن معیاری تعلیم میں ابھی بہت کام کرنا باقی ہے۔کورونا کے دور میں ریاست کے تعلیمی نظام کو دوبارہ پٹری پر لانے کے لیے، ریاستی حکومت نے بجٹ کے دوران ’سب پڑھے، سب بڑھے‘ کا منتر دے کر اپنا ارادہ ظاہر کیا تھا۔ حکومت نے رواں مالی سال میں تعلیمی بجٹ میں 1155.94 کروڑ روپے کا اضافہ کیا ہے۔ نیتی آیوگ کے انڈیکس کے مطابق رہنے کے لیے ای-کنٹینٹ لرننگ، اساتذہ کے تربیتی پروگرام، تحقیق اور تعلیم کے میدان میں اختراع پر خصوصی توجہ دی جا رہی ہے۔ محکمہ تعلیم کا زور بھی ڈیجیٹل یا آن لائن میڈیم کے ذریعے تعلیم فراہم کرنے پر ہے۔ کووڈ-19 کی وبا کی وجہ سے تعلیم سے محروم آنگن واڑی اور بنیادی اسکولوں کے بچوں میں تعداد اور بنیادی خواندگی کی شرح کو برقرار رکھنے پر توجہ دی جارہی ہے۔ ریاست میں تقریباً 1.18 لاکھ آنگن واڑی مراکز چل رہے ہیں۔ حالیہ برسوں میں آنگن واڑی مراکز کو شفافیت کے دائرے میں رکھ کر کچھ تبدیلیاں کی گئی ہیں۔
ریاست کے 72 ہزار سے زیادہ پرائمری اسکولوں کے 1.39 کروڑ بچوں کو”نیپون بہار یوجنا“ سے جوڑ کر تعلیمی نظام کو مضبوط کیا جا رہا ہے۔ اس پروگرام کے تحت، بنیادی مقصد بچوں کو پڑھنے لکھنے، حروف کی شناخت، ان کے معنی، جوڑ اور گھٹاؤ اور عمر سے متعلق دیگر عددی سرگرمیوں کو حل کرنے میں ماہر بنانا ہے۔’سائیکل اور اسکولی ڈریس کی اسکیم‘ اور’مڈ ڈے میل اسکیم‘ ایسی دو اسکیمیں ہیں، جنہوں نے بہار کے سرکاری اسکولوں میں بچوں کی حاضری اور داخلہ کے فیصد میں اضافہ کیا ہے، لیکن معیاری تعلیم کا ہدف ابھی تک حاصل کرنا اتنا آسان نہیں ہے۔ اس کو ذہن میں رکھتے ہوئے ریاستی حکومت نے مختلف پروگرام شروع کیے ہیں۔رواں مالی سال میں مشن نیپون پروگرام کے تحت ریاست بھر کے پرائمری اسکولوں میں تیسری جماعت کے بچوں کے درمیان شروع کیا گیا”چہک“ پروگرام بنیادی تعلیم کو کامیاب بنانے کی سمت میں ایک اچھا اقدام کہا جا سکتا ہے۔ چھوٹے بچوں کے درمیان ’چہک‘ کرانے کا مقصد کھیل کود، جسمانی سرگرمیوں، نمبر علم، عملی اور سماجی علم کو فروغ دینا، اسکول میں اساتذہ اور ہم جماعت کے درمیان دوستانہ ماحول پیدا کرنا وغیرہ ہے۔ اس سلسلے میں محکمہ تعلیم کے ایڈیشنل چیف سیکریٹری سنجے کمار کا کہنا ہے کہ اس اسکیم کو عملی جامہ پہنانے کے لیے بہار ایجوکیشن پروجیکٹ کونسل، ایس سی ای آر ٹی، یونیسیف سمیت تعلیم کے میدان میں کام کرنے والی کچھ این جی اوز کی مدد لی جارہی ہے۔این سی ای آر ٹی نے اسکول کی تیاری سے متعلق تدریسی مواد تیار کیا ہے۔ اس اسکیم کے کامیاب نفاذ کے لیے بچوں کے لیے ورک بک، دیگر تدریسی مواد، پوسٹرز، نپن بہار کے تھیم سانگ وغیرہ تیار کیے گئے ہیں۔اس کے ساتھ ساتھ سرکاری اسکولوں میں تعلیمی ماحول کو بہتر بنانے کے لیے سمارٹ کلاسز، مفت کتابیں، اسکالرشپ اسکیم سمیت متعدد اسکیمیں چلائی جارہی ہیں۔ گزشتہ دو سالوں سے’داخلہ فیسٹیول‘ بھی منایا جا رہا ہے۔ اس کے باوجود مثال کے طور پر اگر ہم ریاست کے ایک بڑے ضلع مظفر پور کی بات کریں تو یہاں پہلی جماعت میں بچوں کی تعداد نہیں بڑھ رہی ہے۔ کورونا کے دور میں سرکاری سکولوں میں بچوں کی تعداد میں حیران کن طور پر اضافہ ہوا تھا لیکن حالات معمول پر آتے ہی والدین نے نام کٹوانے کے بعد دوبارہ اپنے بچوں کو پرائیویٹ سکولوں میں داخل کروانا شروع کر دیا۔ ضلع میں گزشتہ دو سالوں میں بچوں کے داخلے کی شرح میں 25 فیصد سے زائد کمی آئی ہے جو کہ تشویشناک ہے۔ اس حوالے سے مظفر پور کے ڈسٹرکٹ ایجوکیشن آفیسر اجے کمار کا کہنا ہے کہ سرکاری اسکولوں میں داخلہ کے تناسب کو بڑھانے اور بہتر تعلیمی ماحول کی تیاری کا کام کیا جا رہا ہے۔ انرولمنٹ کیوں کم ہوئی، اس کا جائزہ لیا جا رہا ہے۔
حال ہی میں پرائمری اسکولوں میں ‘بیگلس سیف سنیچر شروع کیا گیا ہے، جس کا موضوع ”ہرسنیچر ایک دلچسپ اختراع“ہے۔ یہ پروگرام پہلی سے آٹھویں جماعت کے طلبہ کے لیے لازمی ہے، لیکن رضاکارانہ طور پر، نویں سے بارہویں جماعت کے طلبہ بھی ان سرگرمیوں میں حصہ لے سکتے ہیں۔ بیگ لیس سیف سنیچر کے دن، بچے بغیر تھیلوں یا اسکول بیگ کے اسکول آتے ہیں۔ اس دن بچے اپنی دلچسپی کے مطابق تخلیقی سرگرمیوں میں شامل ہوتے ہیں جیسے کہ کھیل، مصوری، گانا، رقص وغیرہ۔’والدین ٹیچر سیمینار‘ اور بیداری سیشن وغیرہ جیسے پروگرام اس سمت میں اٹھائے گئے ایک اچھے اقدام ہیں۔ صرف وہی اساتذہ جو خود پڑھانے میں ماہر ہوں طالب علم کو بہتر تعلیم دے سکتے ہیں۔ محکمہ تعلیم اساتذہ کو جدت سے جوڑنے، بچوں کی نفسیات کے مطابق برتاؤ کرنے، بچوں کے درمیان دوستانہ ماحول برقرار رکھنے اور انہیں کھیلوں میں پڑھانے کے لیے تیار کرنے کے لیے مسلسل ایک یا دوسری تربیت کا اہتمام کرتا ہے۔ 30 روزہ ٹریننگ، ایمرجن ٹریننگ، سائنس ٹریننگ، لینگویج ٹریننگ، میتھس ٹریننگ اور لائلٹی ٹریننگ کے ذریعے اساتذہ کو پڑھائی اور سیکھنے میں ماہر بنانے کی تربیت دی گئی ہے۔حق تعلیم ایکٹ 2009 کے تحت پرائمری اور سیکنڈری تعلیم کے معیار کو یقینی بنانا حکومت کی ذمہ داری ہے۔ نئی تعلیمی پالیسی 2022 کا بنیادی مقصد ملک میں اب تک فراہم کی جانے والی تعلیم میں انقلابی تبدیلیاں لانا بھی ہے۔
لیکن کیا اساتذہ کی شدید کمی کا سامنا کرنے والے سرکاری اسکولوں میں یہ تبدیلی ممکن ہے؟ بہار میں پچھلے سال اساتذہ کی بھرتی کا چھٹا مرحلہ مکمل ہونے کے بعد بھی تقریباً ایک لاکھ بائیس ہزار اساتذہ کی کمی ہے۔ وزیر تعلیم ساتویں مرحلے کی بحالی کا عمل جلد مکمل کرنے کا دعویٰ کر رہے ہیں۔ لیکن دیکھنا یہ ہے کہ بہار میں اساتذہ کی کمی کب تک پوری ہوگی۔ ہیڈ ماسٹرز کو بحال کرنے کی مشق بھی جاری ہے۔ اس وقت کئی سکولوں میں انچارج ہیڈ ماسٹرز کے ساتھ کام ہو رہا ہے۔ یونیفائیڈ ڈسٹرکٹ انفارمیشن سسٹم فار ایجوکیشن کی رپورٹ 2020-21 کے مطابق، بہار میں پچھلے ایک سال میں ملک میں سب سے زیادہ 2945 نئے سرکاری اسکول کھولے گئے ہیں، لیکن اساتذہ کی تعداد اس سے کم ہے۔ اس کے باوجود ریاست کے سرکاری اسکولوں میں اسکول چھوڑنے کے مسئلے میں کمی آئی ہے۔مشرقی چمپارن کے کلیان پور کے شیتل پور ایڈوانسڈ سیکنڈری اسکول کے استاد ڈاکٹر ستیش کمار کا کہنا ہے کہ موجودہ تعلیمی نظام میں مزید بہتری کی گنجائش ابھی باقی ہے۔ حالیہ برسوں میں حکومت کی جانب سے تعلیمی ماحول کو بہتر بنانے کے لیے جو اسکیمیں چلائی جارہی ہیں اور جس طرح بچوں اور اساتذہ کے لیے تربیت کا اہتمام کیا جارہا ہے وہ قابل تعریف ہے۔ لیکن یہ کوشش تب ہی نتیجہ خیز ہو گی جب اساتذہ کے ساتھ ساتھ والدین بھی اس کے لیے تیار ہوں گے۔ جبکہ والدین اساتذہ کی بے حسی کو اس کی سب سے بڑی کوتاہی بتا رہے ہیں۔
ریاست کے ایک اہم شہر مظفر پور کے مشہری بلاک کے پرہلاد پور مڈل اسکول میں زیر تعلیم کلاس 6 کی ایک طالبہ کی والدہ سنائینا دیوی کا کہنا ہے کہ حکومت توجہ دے رہی ہے، لیکن اساتذہ اسے سنجیدگی سے نہیں لے رہے ہیں۔ ان کا الزام ہے کہ اس اسکول کے کئی اساتذہ نہ تو وقت پر اسکول آتے ہیں اور نہ ہی بچوں کو دل لگا کر پڑھاتے ہیں۔ ایسے میں سوال یہ پیدا ہوتا ہے کہ اس طرح ریاست کا تعلیمی نظام کیسے مضبوط ہوگا؟ بنیادی تعلیم کو بہتر بنانے کے لیے ریاستی حکومت، محکمہ تعلیم، پرنسپل سے لے کر اساتذہ، مقامی شہریوں اور والدین کو بھرپور کوششیں کرنی ہوں گی، تب ہی ہم سرکاری اسکولوں کے نظام اور تدریسی ماحول کو بہتر بنا سکتے ہیں۔ (چرخہ فیچر)
9350461877