سیکریٹری ریڈ کراس کشتواڑ اصغر شیخ و رضاکاوں سمیت کئی محکموں کے ملازمین نے کی شرکت
بابر فاروق
کشتواڑ؍؍ضلع یونٹ ریڈ کراس سوسائٹی کشتواڑ نے ایلڈر لائن کشتواڑ یونٹ کشتواڑ کے اشتراک سے ریڈ کراس کا دن بڑے جوش و خروش کے ساتھ منایا۔ اس تقریب میں ضلع انتظامیہ کشتواڑ کے کئی اعلیٰ آفیسران بشمول اے ڈی ڈی سی کشتواڑ شام لال، اے ڈی سی کشتواڑ اندرجیت سنگھ پریہار، ڈی پی او کشتواڑ سنیل بھٹیال، ضلع سوشل ویلفئیر آفیسر کشتواڑ زبیر احمد، تحصیلدار کشتواڑ منیب عمر، اکاؤنٹس آفیسر عمران احمد کچلو کے علاوہ کئی دیگر آفیسران نے شرکت کی۔ اس موقع پر سکریٹری ریڈ کراس کشتواڑ اصغر شیخ، ریڈ کراس سوسائٹی کے ممبر رضاکار، محکمہ فائر اینڈ ایمرجنسی کا عملہ، ٹریفک پولیس، کئی صحافی بھی موجود تھے۔ یومِ ریڈ کراس ہر سال آٹھ مئی کو انٹرنیشنل کمیٹی آف ریڈ کراس کے بانی ہنری ڈننٹ کے یوم پیدائش کے اعزاز میں منایا جاتا ہے۔ یہ دن دنیا بھر میں ریڈ کراس سوسائٹی کی انسانی بنیادوں پر امداد اور ضرورت مندوں کو مدد فراہم کرنے کی کوششوں کو تسلیم کرنے کے لیے منایا جاتا ہے۔اس موقع پر خطاب کرتے ہوئے آفیسران نے بحران کے وقت امداد فراہم کرنے میں ریڈ کراس سوسائٹی کی اہمیت پر زور دیا، چاہے وہ قدرتی آفات ہوں یا انسان کی بنائی ہوئی ہنگامی صورتحال۔ انہوں نے امن کے فروغ، انسانی وقار کے تحفظ اور انسانی مصائب کے خاتمے میں سوسائٹی کی کوششوں کی بھی تعریف کی۔انہوں نے ریڈ کراس ٹیم کے لیے نیک خواہشات کا اظہار کیا اور لوگوں سے اپیل کی کہ وہ بحران کے وقت یونٹ کے ساتھ تعاون کریں۔کشتواڑ میں یومِ ریڈ کراس کی تقریب شاندار رہی جس میں ہر کوئی انسان دوستی کے مقصد کی حمایت کے لیے اکٹھا ہوا۔ کشتواڑ کی ضلع اکائی نے ریڈ کراس سوسائٹی کے ساتھ مل کر کام کرنے کے عزم کا اظہار کیا تاکہ سب کے لیے ایک بہتر اور زیادہ منصفانہ دنیا کی تشکیل کی جا سکے۔
