کھیل کا ہماری سماجی اور نفسیاتی نشوونما میں مثبت اور تعمیری کردار ہے:حفیظ قریشی
لازوال ڈیسک
بنی؍؍ پرنسپل جی ڈی سی بنی پروفیسر ڈاکٹر منیشا سروپ کوہلی نے آج یہاں جی ڈی سی کالج گراؤنڈ سرتھلی میں T-10 کرکٹ ٹورنامنٹ کا افتتاح کیا۔اس ٹورنامنٹ کا انعقاد بھارت اسپورٹس کلب بنی نے دور دراز کے علاقوں میں کھیلوں سے متعلق جذبے کو فروغ دینے اور نوجوان اور امید افزا صلاحیتوں کو کھیلوں کے مقصد کے لیے اکٹھے ہونے کا موقع فراہم کرنے کے لیے کیا تھا۔اس موقع پر گفتگو کرتے ہوئے پرنسپل جی ڈی سی بنی نے بتایا کہ کس طرح کرکٹ ان کے بچپن سے ہی ان کا جنون رہا ہے اور نوجوانوں کو تناؤ کو شکست دینے اور جسمانی اور ذہنی فٹنس کو بڑھانے کے لیے کھیلوں میں حصہ لینے کی تلقین کی۔اس موقع پرحفیظ قریشی صدر بھارت اسپورٹس کلب بنی نے کہا کہ اس کھیل کا ہماری سماجی اور نفسیاتی نشوونما میں مثبت اور تعمیری کردار ہے۔انہوں نے کہاکہ اس طرح کے ایونٹس نوجوانوں کو مثبت سرگرمیوں میں مشغول کرنے کے قابل بناتے ہیں۔قریشی نے کہاکہ ٹورنامنٹ کے انعقاد کا مقصد نوجوانوں کو جوڑنا اور منشیات کے خلاف بیداری پھیلانا ہے۔واضح رہے بنی کے مختلف علاقوں سے کل 12 ٹیمیں اس ناک آؤٹ اور پوائنٹس ٹیبل ٹورنامنٹ میں شرکت کرنے والی ہیں۔
