اقتدار کی خاطر سیاستدانوں کے ہتھکنڈوں کو دکھایا گیا
لازوال ڈیسک
جموں؍؍نٹرنگ نے سنڈے تھیٹر سیریز کے تحت آج یہاں نٹرنگ اسٹوڈیو تھیٹر میں نیرج کانت کی ہدایت کاری میں منی مادھوکر کا لکھا ہوا ایک مشکل ترین سیاسی طنزیہ ’ٹوپیاں‘ پیش کیا۔واضح رہے یہ ڈرامہ ان ہوس پرست سیاست دانوں کی کھوج ہے جو گرگٹ سے زیادہ تیزی سے رنگ بدل سکتے ہیں تاکہ وہ اقتدار میں رہیں۔ ان کے لیے مشن عوام کو بے وقوف بنانا ہے اور اس کے لیے ان کے پاس مطلوبہ تھیٹر آرٹ، جانکاری، مہارت اور حالات اور ضرورت کے مطابق خود کو کسی بھی رنگ یا لباس میں ڈھالنے کی مہارت ہے۔ انسانی تہذیب نے بہت سارے سماجی اور سیاسی انقلابات دیکھے ہیں، ہر بار مفکرین اور فلسفیوں نے نئے سیاسی افکار اور حکمرانی کے نظریے کو فروخت کیا ہے۔ لیکن ستم ظریفی یہ ہے کہ انہی چہروں نے نئے نقابوں میں اصلی چہروں کو چھپا کر اقتدار تک رسائی حاصل کر لی ہے۔دریں اثناء ڈرامہ نگار نے کامیابی سے پیش کیا کہ سیاست دان ایک جیسے ہوتے ہیں۔ وہ صرف عوام کو بیوقوف بنانے کے لیے اپنی ٹوپیاں اور رنگ بدلتے ہیں۔ وہ بیک وقت دوست بھی ہو سکتے ہیں اور دشمن بھی، اقتدار کی ہوس کے لیے ان کی مساوات اور تصادم بدل جاتے ہیں۔
