لازوال ڈیسک
سانبہ؍؍اپنی پارٹی کے صوبائی صدر جموں اور سابق وزیر ایس منجیت سنگھ نے کہا کہ نوجوانوں کا پارٹی قیادت اور ترقی کے اس کے ایجنڈے پر اعتماد پیدا ہوا ہے۔ واضح رہے یوتھ ونگ باری برہمنہ کے بلاک صدر عرفان چودھری نے نوجوانوں کی ایک میٹنگ کا اہتمام کیا جہاں پارٹی کے صوبائی صدر تبادلہ خیال کررہے تھے۔ اس موقع پر اپنی ٹریڈ یونین کے سیکرٹری محمد اشرف بھی موجود تھے۔ یہ میٹنگ ضلع سانبہ کے گاؤں مین سرکار، بڑی برہمنہ میں منعقد کی گئی تھی۔
وہیں ملاقات کے دوران نوجوانوں نے بڑھتی ہوئی بے روزگاری اور نجی شعبے اور صنعتی شعبے میں ناکافی مواقع پر اپنی تشویش کا اظہار کیا۔تاہم بحث کے دوران سابق وزیر نے کہا کہ روایتی سیاسی جماعتیں عوام کی توقعات کے مطابق ڈیلیور کرنے میں ناکام رہی ہیں۔ انہوں نے جموں کے ساتھ امتیازی سلوک کی پالیسی کا حوالہ دیتے ہوئے کہا کہ ان سیاسی جماعتوں نے نوجوانوں کا ووٹ بینک کے طور پر استحصال کیا ہے اور معاشرے کو خطے اور مذہب کے نام پر تقسیم کرنے کی کوشش کی ہے۔
انہوں نے کہا کہ جموں کو کئی سالوں کے بعد بے روزگاری، ترقی اور فنڈز کی تقسیم کے حوالے سے بدترین تفاوت کا سامنا ہے کیونکہ یہاں کوئی منتخب حکومت نہیں ہے۔جموں و کشمیر کے دونوں خطوں میں نوجوانوں کے استحصال کے تناظر میں انہوں نے کہا کہ نوجوانوں نے اب اپنی پارٹی سے اپنی امیدیں وابستہ کر لی ہیں کیونکہ اس کے ترقیاتی ایجنڈے اور اتحاد و یکجہتی کو فروغ دینے کی پالیسی ہے۔
