لگژری کاروں پر جی ایس ٹی بڑھانے کی آرڈنینس منظور
یواین آئی
نئی دہلی؍؍حکومت نے لگژری گاڑیوں پر اشیاء و خدمات ٹیکس (جی ایس ٹی ) چارج 15 فیصد سے 25 فیصد کرنے کے لئے جی ایس ٹی(ریاستوں کے لئے معاوضہ) ایکٹ 2017 میں ترمیم کے لئے آرڈنینس کو منظوری دے دی ہے ۔ وزیر اعظم نریندر مودی کی زیر صدارت کابینہ کے اجلاس میں وزارت خزانہ کی اس تجویز کومنظور ی دی گئی۔ اجلاس کے بعد وزیر خزانہ ارون جیٹلی نے صحافیوں کو بتایا کہ اس آرڈیننس سے جی ایس ٹی کونسل کو مسافرگاڑیوں کے دو زمرے میں جی ایس ٹی 15 فیصدسے 25 فیصد تک کرنے کا حق مل گیا ہے ۔ انہوں نے کہا کہ اب جی ایس ٹی کونسل کو فیصلہ کرنا ہے کہ جی ایس ٹی چارج میں کب سے اضافہ کیا جائے گا۔ وزیر موصوف نے یہ واضح کیا کہ اس سے چھوٹی اور درمیانے درجے کی گاڑیوں پر کوئی اثر نہیں پڑے گا۔ انہوں نے کہا کہ جی ایس ٹی میں مسافر گاڑیوں کی 12 قسموں کا ذکر ہے ، جن میں سے آخری دو اقسام کی گاڑیوں کے جی ایس ٹی چارج میں اضافہ کیا جائے گا۔
