نئی دہلی، 9 اگست (یو این آئی) عام آدمی پارٹی (اے اے پی) کے راجیہ سبھا ممبر سشیل کمار گپتا نے بدھ کے روز کہا کہ وہ مہنگائی پر حکومت کی توجہ مبذول کرانے کے لیے ٹماٹر کا مالا پہن کر ایوان میں آئے تھے۔
ایوان کی کارروائی ملتوی ہونے کے بعد باہر آتے ہوئے مسٹر گپتا نے پارلیمنٹ ہاؤس کے احاطے میں نامہ نگاروں سے کہا کہ وہ ٹماٹر کا مالا پہن کر ایوان میں آئے تھے تاکہ حکومت کی توجہ مہنگائی کی طرف مبذول کرائی جائے۔ انہوں نے کہا کہ مہنگائی کی وجہ سے عام آدمی کے کچن کا بجٹ بگڑ رہا ہے۔ حکومت کو اس طرف توجہ دینی چاہیے۔ حکومت کو دیکھنا چاہیے کہ عوام کس حال میں ہیں۔
انہوں نے کہا، ”وہ ارکان کے زیور پہن کر ایوان میں آنے کے اصول سے واقف نہیں ہیں۔ مہنگائی کی وجہ سے چیزیں زیورات کی مانند ہوجاتی ہیں۔ ٹماٹر اور ادرک عام آدمی کی پہنچ سے باہر ہیں۔ مختلف مقامات پر اس کی قیمت 250 سے 300 روپے فی کلو تک پہنچ گئی ہے۔
مسٹر گپتا نے کہا کہ اگر اسپیکر جگدیپ دھنکھڑ ٹماٹر کا مالا پہن کر ایوان میں آنے سے ناراض ہیں تو وہ مالا اتار دیں گے۔ انہوں نے کہا کہ وہ اسپیکر کا بہت احترام کرتے ہیں۔
مسٹر گپتا نے کہا کہ انہوں نے اپنی بیوی سے کہا تھا کہ وہ کچھ ٹماٹر اور ادرک کا آرڈر دیں۔ بیوی نے اس کا مقصد بھی پوچھا تو انہوں نے کہا کہ وہ اس کا مالا پہن کر راجیہ سبھا جائیں گے۔ انہوں نے کہا کہ اہلیہ نے بھی ناراضگی کا اظہار کیا کہ اتنی مہنگی چیز کا مالا پہننے کی کیا ضرورت تھی۔
واضح رہے کہ مسٹر گپتا آج ٹماٹروں کا مالا پہن کر ایوان میں پہنچے جس کی وجہ سے چیئرمین کافی ناراض ہوئے اور انہوں نے ایوان کی کارروائی دوپہر 2 بجے تک ملتوی کر دی۔
