وکست بھارت سنکلپ یاترانے عام شہریوں کی امنگوں اور عزت کو بڑھایا :ڈاکٹر جتیندر
کہاوی بی ایس وائی کے آغاز کے بعد سے سرکاری ملازمین اب شہریوں کی دہلیز پر خدمات فراہم کر رہے ہیں
لازوال ڈیسک
جموں؍؍ مرکزی وزیر مملکت ڈاکٹر جتیندر سنگھ نے کہا کہ وکست بھارت سنکلپ یاترا نے عام شہریوں کی امنگوں اور عزت کو بڑھایا ہے اور سیاسی اور سرکاری سطح پر کام کے کلچر میں تبدیلی لائی ہے۔واضح رہے مرکزی وزیر وزیر اعظم نریندر مودی کی وی بی ایس وائی کے استفادہ کنندگان کے ساتھ ورچوئل بات چیت میں شرکت کے بعد میڈیا کے نمائندوں سے خطاب کر رہے تھے۔ انہوں نے کہا کہ وی بی ایس وائی نے لوگوں کے رویے کو بھی بدل دیا ہے۔ ڈاکٹر جتیندر سنگھ نے ورک کلچر میں تبدیلی کی وضاحت کرتے ہوئے کہا کہ وی بی ایس وائی کے آغاز کے بعد سے سرکاری ملازمین اب شہریوں کی دہلیز پر خدمات فراہم کر رہے ہیں۔ڈاکٹر جتیندر سنگھ نے کہا، پہلے لوگوں کو اپنا کام کروانے کے لیے سرکاری محکموں کے چکر لگانے پڑتے تھے اور دورہ کرنے کے باوجود ان کا کام بدستور التواء کا شکار رہتا تھا۔ نتیجے کے طور پر، وہ مایوسی محسوس کرتے تھے ۔ڈاکٹر سنگھ نے مزید کہا کہ اب وہ سب کچھ بدل گیا ہے۔مرکزی وزیر نے کہا کہ وی بی ایس وائی کی وجہ سے لوگوں کی امنگوں میں اضافہ ہوا ہے کیونکہ حکومت ان کے خوابوں کو پورا کر رہی ہے۔ انہوں نے کہا کہ غریبوں اور پسماندہ افراد کے پاس اب پی ایم آواس یوجنا کے تحت اپنے کنکریٹ کے گھرہیں۔ وزیر نے کہا کہ ضلعی عہدیدار خود لوگوں تک پہنچ رہے ہیں، ان پر زور دے رہے ہیں کہ وہ سرکاری خدمات کا فائدہ اٹھائیں کیونکہ انہیں وزیر اعظم مودی کی قیادت والی حکومت کے سامنے جوابدہ ہونا ہے۔ ڈاکٹر جتیندر سنگھ نے کہا کہ پی ایم اجولا یوجنا نے نہ صرف خواتین کو بااختیار بنایا ہے اور ان کی عزت میں اضافہ کیا ہے بلکہ ان کی صحت کا بھی خیال رکھا ہے کیونکہ انہیں کھانا پکانے کے روایتی طریقوں سے نکلنے والی زہریلی ہوا کا سامنا کرنا پڑتا تھا اور اب یہ کلچر بھی بدل چکا ہے ۔ وزیر نے کہا کہ اسی طرح خواتین کو گھروں میں بیت الخلاء کی عدم موجودگی میں کھلے میں رفع حاجت کرنے کی ضرورت نہیں ہے۔ ڈاکٹر سنگھ نے مزید کہا کہ سوچھ بھارت مشن نے عوامی استعمال کے لیے بیت الخلاء کی تعمیر کے ساتھ دیہی منظر نامے کو مکمل طور پر بدل دیا ہے۔مرکزی وزیر نے زور دے کر کہا کہ ترقی حکومت کا اصل منتر ہے جس نے سیاست سے اوپر اٹھ کر ملک بھر میں سماج کے تمام طبقات کی خدمت کے لیے خود کو عہد کیا ہے۔
