بجبہاڑہ میں روڈ شو کیا ،کہاہم پارلیمنٹ میں ترقیاتی مطالبات اٹھائیں گے
لازوال ڈیسک
اننت ناگ؍؍ڈیموکریٹک پروگریسو آزاد پارٹی (ڈی پی اے پی) کے چیئرمین غلام نبی آزاد نے آج علاقائی پارٹیوں پر تنقید کی کہ وہ اپنی انتخابی مہم میں اہم عوامی مسائل کو نظر انداز کر رہی ہیں۔ بجبہاڑہ اننت ناگ میں روڈ شو کی ایک سیریز کے دوران، آزاد نے موجودہ سیاسی گفتگو سے اپنی عدم اطمینان کا اظہار کرتے ہوئے کہا کہ یہ پارٹیاں دعویٰ کرتی ہیں کہ انتخابات پانی اور بجلی جیسے بنیادی مسائل سے متعلق نہیں ہیں۔آزاد نے سوال کیا کہ اگر یہ جماعتیں عوام کو درپیش حقیقی مسائل پر توجہ نہیں دے رہی ہیں تو وہ الیکشن کیوں لڑ رہی ہیں؟ انہوں نے سوالیہ عائد کرتے ہوئے کہاکہ کیا وہ یہاں ایک بار پھر معصوم لوگوں کا استحصال کرنے آئے ہیں؟ انہوں نے ان اہم خدشات کو اجاگر کیا جو روزمرہ کی زندگی کو متاثر کرتے ہیں، جس میں بجلی کے بلوں میں نمایاں اضافہ، دیہی علاقوں میں پانی کی سہولیات کی کمی، بڑھتی ہوئی بے روزگاری، اور نوجوانوں میں منشیات کے استعمال کے بڑھتے ہوئے مسئلے کو نمایاں کیا گیا۔
انہوں نے اس بات پر زور دیا کہ نوجوان ملازمتوں کے لیے باہر کے لوگوں سے مقابلہ کرنے پر مجبور ہیں، جس سے ان کی جدوجہد میں مزید اضافہ ہوتا ہے۔آزاد نے کہاکہ یہ نازک مسائل انتخابی ایجنڈے کا حصہ کیوں نہیں ہیں؟ آزاد نے ووٹرز پر زور دیا کہ وہ احتساب کا مطالبہ کریں اور انہیں روزانہ درپیش چیلنجوں کے حقیقی حل پر توجہ دیں۔ انہوں نے کہاکہ کشمیریوں کو بے وقوف بنانا ان کی عادت بن گئی ہے۔ برسوں تک انہوں نے خود حکمرانی اور خودمختاری کے ساتھ انہیں بے وقوف بنایا، اور اب وہ آرٹیکل 370 کے ساتھ انہیں بیوقوف بنا رہے ہیں۔ انہوں نے کہاکہ میں ان سے پوچھنا چاہتا ہوں، اگر آپ آرٹیکل 370 کے بارے میں سنجیدہ ہیں تو کیوں؟ کیا آپ نے سپریم کورٹ میں کوئی بات نہیں کی؟ موجودہ ممبران اور چیف منسٹرز نے آرٹیکل 370 پر بی جے پی کو سپورٹ کیا اور اب آپ ان سے آرٹیکل 370 کو واپس لینے کی امید کرتے ہیں؟ اگر ہم اقتدار میں آئے تو زمین اور ملازمتوں کے تحفظ کا قانون پاس کریں گے۔
اس دوران انہوں نے لوگوں سے اپیل کی کہ وہ آئندہ لوک سبھا انتخابات میں ان کے امیدوار ایڈوکیٹ سلیم پرے کی حمایت کریں۔ انہوں نے ووٹروں کو یقین دلایا کہ سلیم پرے پارلیمنٹ میں ان کے مسائل اور مطالبات اٹھانے کے لیے پرعزم ہیں۔ انہوں نے نوجوان رہنماؤں کو بااختیار بنانے اور نوجوان کشمیریوں کو اپنی برادریوں کی نمائندگی کا موقع فراہم کرنے کے اپنے عزم پر مزید زور دیا۔ انہوں نے کہا کہ میں نے ان نوجوان لیڈروں کو اپنے لوگوں کے لیے کھڑے ہونے کا موقع دیا ہے۔ اس موقع پرایڈووکیٹ سلیم پرے امیدوار، ترجمان اعلیٰ سلمان نظامی، ڈی پی اے پی کے سینئر رہنما مفتی سرور اور دیگر بھی موجود تھے۔
