ریاض، //سعودی عرب نے اپنی ایئربیس پر غیر ملکی افواج کی موجودگی سے متعلق خبروں کی تردید کردی۔
سعودی وزارت دفاع نے اپنے بیان میں کہا کہ طائف کی کنگ فہد ایئربیس پر غیر ملکی افواج کی موجودگی کی افواہیں درست نہیں ہیں۔
سعودی میڈیا کے مطابق یمن پر امریکی اور برطانوی افواج کے حملوں سے قبل یہ افواہ پھیلائی گئی تھی۔
یمن بھی ایک بیان میں خبردار کرچکا ہے کہ یمن پر جارحیت کے لیے غیر ملکی افواج کو فضائی حدود دینے والے عرب ممالک جارحیت میں برابر کے شریک ہوں گے۔
واضح رہے کہ امریکا اور برطانیہ کی جانب سے 11 جنوری کو رات گئے یمن کے دارالحکومت صنعا سمیت مختلف شہروں میں حوثیوں کے ٹھکانوں پر فضائی حملے کیے گئے تھے۔
غیر ملکی خبر رساں اداروں کی رپورٹس میں عرب میڈیا کے مطابق لڑاکا طیاروں، بحری جہازوں اور آبدوزوں کی مدد سے یمن کے دارالحکومت صنعا، بندرگاہی شہر حدیدہ اور شمالی شہر سعدہ میں درجن بھر سے زائد مقامات پر بمباری کی گئی، حملوں میں ٹام ہاک میزائلوں کا بھی استعمال کیا گیا۔
سعودی عرب نے ردعمل دیتے ہوئے کہا تھا کہ اپنے ہمسایہ ملک یمن پر امریکی اور برطانوی فضائی حملوں پر ’گہری تشویش‘ ہے۔
