بھوپال، // مدھیہ پردیش کے سابق وزیر اعلیٰ دگ وجے سنگھ نے ریاست میں بچیوں کی حفاظت کے معاملے پر آج ایک بار پھر حکومت کو نشانہ بناتے ہوئے کہا کہ لڑکیوں کی حفاظت کی ذمہ داری وزیر اعلی شیوراج سنگھ چوہان کی ہے اور وہ اس بارے میں سوچیں۔
مسٹرسنگھ نے سوشل میڈیا پلیٹ فارم ایکس پر پوسٹ کیا ’شیوراج جی کنیا پوجن کے نام پر اغوا کہا ہو رہاہے؟آپ دیکھ رہے ہیں کہ نہیں؟اسی بھوپال میں آپ کی ناک کے نیچے۔ مجھے نشانہ بنا کر وقت بچاہو تو لڑکیوں کو بھی بچالیجئے۔بیٹیوں کی حفاظت بھی فی الحال آپ کی ذمہ داری ہے۔‘
اس سے پہلے مسٹر سنگھ نے مبینہ طور پر وزیر اعلی مسٹر چوہان کے نوراتری کے دوران کنیا پوجن کے بارے میں بھی بیان دیا تھا۔ اس کے بعد مسٹر چوہان نے کل مختلف مقامات پر اپنے بیان میں کہا کہ بیٹیوں کی پوجا ایک لازوال روایت ہے، لیکن اس تعلق سے بھی ’ناٹک نوٹنکی‘کی بات کی جا رہی ہے۔ انہوں نے سوالیہ لہجے میں کہا کہ سناتن اور شیوراج کی مخالفت کرتے ہوئے کوئی بھی لیڈر اس حد تک گر جائے گا کہ اسے اپنی بیٹیوں کی عزت کے خیال سے بھی تکلیف ہونے لگی ہے۔ اس کے بعد آج صبح مسٹر سنگھ نے مسٹر چوہان سے اس معاملے پر دوبارہ سوال کیاہے۔
دراصل راجدھانی بھوپال میں دو دن پہلے کنیا پوجن کے بہانے ایک گروپ نے دو معصوم لڑکیوں کو اغوا کر لیا تھا۔ دریں اثناء پولیس نے کولار کے علاقے میں کرائے کے مکان پر چھاپہ مارا، جس میں اغوا لڑکیاں برآمد ہوئیں، جنہیں پولیس نے ملزمان کے چنگل سے آزاد کرا لیا اور موقع سے ایک نابالغ لڑکی سمیت پانچ ملزموں کوحراست میں لیا گیا۔ گرفتار کئے گئے خاندان سے قبضے سے مزید دو لڑکیاں ملی ہیں جن میں سے ایک کی عمر تین ماہ اور دوسری کی ڈھائی سال ہے۔ پوچھ گچھ کے دوران ملزمان نے ان لڑکیوں کو اپنی بیٹیاں بتایا لیکن پولیس کو معاملہ مشتبہ لگ رہا تھا۔ پولیس ملزم سے پوچھ گچھ میں مصروف ہے۔
