سوچھ سرویکشن ایوارڈز کے 8ویں ایڈیشن کے لیے اسٹیج تیار
لازوال ڈیسک
نئی دلی؍؍دنیا کے سب سے بڑے شہری صفائی ستھرائی سروے کے 8ویں ایڈیشن کے نتائج کا انتہائی بے صبری سے انتظار کیا جا رہا تھا ۔ ان میں شہری ہندوستان کے سب سے زیادہ صاف ستھرے شہروں کا اعلان کیا جانا ہے۔ صدر جمہوریہ ہند دروپدی مرمو ، 11 جنوری ، 2024 کو بھارت منڈپم میں ہاؤسنگ اور شہری امور کی وزارت کی طرف سے منعقدہ ایک قومی پروگرام میں، سوچھ سرویکشن کے فاتحین کو اعزازات سے نوازیں گی۔ اس تقریب میں مختلف زمروں کے تحت 110 سے زیادہ ایوارڈز پیش کیے جائیں گے۔ صرف قومی زمرے میں 20 سے زیادہ ایوارڈز ہوں گے۔ اس کے علاوہ ، مختلف زمروں میں ریاستوں کی کارکردگی کو بھی تسلیم کیا جائے گا اور انہیں اعزازات سے نوازا جائے گا۔سوچھ سرویکشن (ایس ایس) نے شہروں کے درمیان صحت مند مسابقت کا احساس پیدا کیا ہے، جس سے انہیں شہری صفائی ستھرائی میں اضافہ کرنے اور اپنے باشندوں کو بہتر خدمات فراہم کرنے کی ترغیب ملی ہے۔ 2016 میں 73 بڑے شہروں کے معمولی جائزے کے ساتھ یہ پروگرام شروع ہوا تھا اور موجودہ ایڈیشن میں اس کی رسائی کو 4,477 شہروں تک بڑھایا گیا ہے ، جس سے سوچھ سرویکشن کے دائرۂ کار میں تیزی سے اضافے کا پتہ چلتا ہے۔ اس سال، کلین سٹی ایوارڈز کی ترجیحات میں پرانی چلی آرہی ڈمپ سائٹس کو ختم کرنا، پلاسٹک کے کچرے کا انتظام کرنا، کم کرنے، دوبارہ استعمال کرنے، ری سائیکل کرنے کے اصولوں کو لاگو کرنا، اور صفائی متروں کی حفاظت کو یقینی بنانا ہے۔ ایس ایس – 2023 نے فضلے کو قیمتی وسائل میں تبدیل کرنے پر توجہ مرکوز کی اور 3,000 سے زیادہ جائزہ لینے والوں کی ٹیم نے اس کا جائزہ لیا۔سروے کا شہریوں کی شمولیت اور تاثرات پر زور اس کی کامیابی میں اہم رہا ہے۔ مجموعی طور پر سروے میں تقریباً 409 ملین کی آبادی کا احاطہ کیا گیا۔ اس سال جائزے کے دوران 12 کروڑ شہریوں کے ردعمل موصول ہوئے، جس سے مختلف چینلز کے ذریعے انجام دی گئی سرگرمیوں کی بے مثال سطح کا پتہ چلتا ہے۔اس سلسلے میں ، 11 جنوری 2024 کو بھارت منڈپم میں کچرے کے بندوبست میں جدید ترین ٹیکنالوجیز اور سازوسامان کے ایک دلچسپ سلسلے کی نمائش کی جائے گی۔ مکینیکل سویپنگ مشینیں، سیوریج صاف کرنے والے روبوٹس، کچرے کو جمع کرنے اور ٹرانسپورٹ گاڑیاں سوچھ سرویکشن ایوارڈز کے مقام پر آنے والوں کی توجہ حاصل کریں گی۔ صرف یہی نہیں، نمائش میں فضلے سے تیار کردہ مصنوعات بھی خرید سکتے ہیں! سیلف ہیلپ گروپس کے ذریعہ رنگین اسٹال لگائے جائیں گے، جو فضلہ سے بنی اپنی تخلیقات فروخت کریں گے۔ تقریب پیپر لیس اور زیرو ویسٹ ایونٹ ہوگی۔ایوارڈ کی تقریب میں 3,000 سے زیادہ شرکائ شرکت کریں گے، جن میں شہری ترقی کے وزیر، ملک کے مختلف حصوں کے میئر، ریاستی اور شہر کے منتظمین، سیکٹر پارٹنرز، موضوع کے ماہرین، نوجوانوں کی تنظیمیں ، صنعت کے نمائندے، صفائی ستھرائی اور کچرے کے بندوبست کے شعبے کے اسٹارٹ ادارے، تعلیمی ادارے، سیلف ہیلپ گروپس، صفائی متر، سی ایس اوز، این جی اوز وغیرہ شامل ہیں۔ سوچھ سرویکشن ایوارڈز کا فوکس صرف جیتنے والے صاف ستھرے شہروں کو انعام دینے پر نہیں ہے ، بلکہ ان شہروں کو تسلیم کرنے پر بھی ہے جنہوں نے کوڑا کرکٹ سے پاک ماحول کے حصول کے لیے نمایاں پیش رفت کی ہے اور مختلف اقدامات کو نافذ کیا ہے۔ ایک سال کی محنت، صحت مند مقابلہ، جوش خروش اور سوچھتا کے جذبے کے بعد، شہر 11 جنوری 2024 کا انتظار کر رہے ہیں جب سوچھ سرویکشن کے 8ویں ایڈیشن کے فاتحین کا اعلان کیا جائے گا۔سنگم نگری پریاگ راج اور بابا وشوناتھ کی نگری وارانسی سمیت اترپردیش کے چھ شہروں کو صفائی کے لئے انعامات کے مختلف کٹیگریز سے نوازہ جائے گا۔آفیشیل ذرائع نے پیر کو بتایا کہ صفائی سروے 2023 کے آنے والے نتائج میں یوپی کے چھ شہروں کو مختلف انعامی زمروں سے نوازہ جائے گا۔ ان میں وارانسی اور پریاگ راج کو صدرجمہوریہ ایوارڈ دیا جائے گا۔ محکمہ شہری ترقیات کے مطابق صفائی سروے 2023 کے نتائج 11جنوری کو نئی دہلی میں اعلان کئے جائیں گے۔انہوں نے بتایا کہ صفائی سروے 2023 میں ریاست کے وارانسی اور پریاگ راج کو صفائی میں ان کی کارکردگی کے لئے ‘صدرجمہوریہ ایوارڈ’ سے نوازہ جائے گا۔ وہیں ریاستی صدر پر نوئیڈا اور ریجنل سطح پر بروار، انوپ شہر اور گجروالا بھی صفائی کو بڑھاوا دینے کے لئے اعزاز سے نوازہ جائے گا۔گذشتہ کل 588 شہر او ڈی ایف سرٹیفکیٹ سے نوازے گئے تھے۔
